Ingvar tekur við formennskunni hjá TR

Ingvar Þór Jóhannesson var í kvöld kjörinn formaður Taflfélags Reykjavíkur. 

Ingvar tekur við formennskunni af Gauta Páli Jónssyni sem sinnti embættinu tímabundið. Tók Gauti við í desember þegar þáverandi formaður TR, Ríkharður Sveinsson, féll frá. 

Ingvar er FIDE-meistari og vel kynntur í hreyfingunni. Hefur hann til að mynda verið liðsstjóri karla- og kvennalandsliðanna á ólympíuskákmótum. 

Var hann kosinn við mikinn fögnuð samkvæmt lýsingum á vef TR. Ingvar fetar í fótspor frænda síns Kjartans Maack sem var formaður TR á árunum 2016-2019. 

Stjórn TR næsta árið skipa: 

Ingvar Þór Jóhannesson, formaður 

Una Strand Viðarsdóttir

Magnús Kristinsson

Jon Olav Fivelstad

Guðlaugur Gauti Þorgilsson

Daði Ómarsson

Þorsteinn Magnússon

Hermanni sómi sýndur

Á fundinum í kvöld var Hermann Ragnarsson gerður að heiðursfélaga Taflfélags Reykjavíkur fyrir störf sín í þágu félagsins.

Þá hefur einnig verið ákveðið að næsta haustmót verði haldið til minningar um Ríkharð Sveinsson. 

TR er elsta taflfélag landsins og var stofnað haustið 1900. Líklega er það með eldri félögum sem eru starfandi í félagsstarfi landans. 

Hermann Ragnarsson á spjalli við fyrsta stórmeistarann Friðrik Ólafsson og Helga Árnason, skólastjóra Rimaskóla, á Opna Reykjavíkurmótinu árið 2016. mbl.is/Styrmir Kári

• Blogga um frétt