Lögreglan á höfuðborgarsvæðinu var kölluð út vegna líkamsárásar á leigubílstjóra.
Þetta kemur fram í dagbók lögreglu en þar segir að meiðsli leigubílstjórans hafi verið minniháttar.
Annasamt var hjá lögreglunni í dag en einnig var tilkynnt um líkamsárás og þjófnað í Garðabæ þar sem minniháttar meiðsli hlutust af. Er lögreglu kunnugt um gerendur, að því er fram kemur í dagbókinni.
Þá var einnig þó nokkuð um tilkynningar vegna eignaspjalla og innbrota, meðal annars í verslun í miðbæ Reykjavíkur og í geymslu í hverfi 105.
Alls voru 45 mál skráð í kerfi lögreglunnar frá því klukkan fimm í morgun og sneri fjöldi þeirra að aðstoðarbeiðnum vegna veikinda og vegna fólks í annarlegu ástandi.