Innlent | mbl | 21.5.2024 | 13:40 | Uppfært 14:03

Úrsögn úr NATO myndi kalla á þjóðaratkvæðagreiðslu

Á forsetafundi Morgunblaðsins og mbl.is á Akureyri í gærkvöldi var Katrín Jakobsdóttir þráspurð hvort hún persónulega væri með eða á móti veru Íslands í Atlantshafsbandalaginu (NATO) en hún svaraði því ekki beint.

Hún var þó áköf í svörum sínum um að hún myndi fylgja utanríkisstefnu Alþingis.

„Alþingi mótar utanríkisstefnuna, Alþingi hefur mótað þá stefnu að Ísland skuli vera innan Atlantshafsbandalagsins. Sem forsætisráðherra hef ég fylgt þeirri stefnu, sem forseti myndi ég að sjálfsögðu fylgja þeirri stefnu,“ sagði Katrín.

Frétt af mbl.is

Mun aðeins sýna þjóðinni hollustu

„Ísland er ekki hlutlaust land“

Hún sagði almenning vita vel að hún hefði talað fyrir „friðarstefnu“ allt sitt líf og að hann væri meðvitaður um hennar afstöðu.

„Eins og ítrekað hefur komið fram hjá mér í þessari kosningabaráttu, raunar ólíkt sumum öðrum frambjóðendum, þá geri ég mér grein fyrir því að Ísland er ekki hlutlaust land. Ísland hefur mótað afstöðu og tekið afstöðu með veru sinni í Atlantshafsbandalaginu, með stuðningi við Úkraínu sem við höfum samþykkt á Alþingi Íslendinga og svona mætti lengi telja.“

Hún gekk svo enn lengra og sagði að ef ríkisstjórnarmeirihluti yrði myndaður sem reyndi að taka Ísland úr NATO þá myndi hún vísa því til þjóðarinnar.

„Segjum sem svo að Alþingi myndaði nú nýjan meirihluta og segði: „Við ætlum að segja okkur úr Atlantshafsbandalaginu.“ Ég myndi segja, er þetta ekki ákvörðun sem á heima hjá þjóðinni?“ sagði hún og uppskar lófaklapp fundargesta.