Innlent | mbl | 22.5.2024 | 11:56 | Uppfært 16:18

Halla Tómasdóttir mætir galvösk til Reykjanesbæjar

Suðurnesjamenn eru hvattir til að mæta á forsetafund mbl.is og Morgunblaðsins í Reykjanesbæ á morgun. Samsett mynd

Síðasti forsetafundur Morgunblaðsins og mbl.is í hringferðinni verður haldinn með Höllu Tómasdóttur fimmtudaginn 23. maí í Reykjanesbæ.

Fundurinn verður haldinn klukkan 19.30 á Park Inn by Radisson og eru allir velkomnir á meðan húsrúm leyfir.

Andrés Magnússon og Stefán Einar Stefánsson munu spyrja Höllu spurninga um forsetaembættið og svo verður opnað fyrir spurningar úr sal frá fundargestum.

Verið á flugi í skoðanakönnunum

Í upphafi fundar verða fengnir tveir álitsgjafar til að rýna í stöðuna á forsetakosningunum og spá í spilin, en innan við tvær vikur eru núna þar til landsmenn ganga til kosninga.

Halla hefur verið á flugi í skoðanakönnunum að undanförnu og munar núna innan við 6 prósentustigum á henni og Katrínu Jakobsdóttur, sem er með mesta fylgið, í nýjustu skoðanakönnun Prósents.