Bjarni ræddi við Selenskí: Úkraína þarf „tæki og tól“
Setja bókamerki
Bjarni Benediktsson forsætisráðherra telur mikilvægt Úkraínumenn hafi öll þau „tæki og tól“ sem þeir þurfa til að verjast innrás Rússa. Hann hitti Selenskí í dag og mun mæta á friðarráðstefnu í Sviss um miðjan júni.
Þetta sagði hann eftir fund sinn með Volodimír Selenskí Úkraínuforseta og öðrum leiðtogum norðurlanda í Stokkhólmi í dag.
Umræðuefnið var stuðningur Norðurlanda við Úkraínu og staðan á friðaráætlun Úkraínu, sem verður rædd á friðarviðræðum í Sviss í júní.
Öll ríkin að ljúka tvíhliða samningi
„Helstu tíðindin eru þau að norrænu ríkin eru öll að ljúka tvíhliða samningum við Úkraínu við stuðning vegna innrásar stríðsins, hvert með sínum hætti,“ sagði Bjarni við blaðamann mbl.is þegar hann gekk út af fundinum. Mikill viðbúnaður er í Stokkhólmi vegna fundarins.
Þingsályktunartillaga að stefnu um stuðning Íslands við Úkraínu 2024 til 2028 var samþykkt á Alþingi í lok apríl.
„Það er mjög ánægjulegt að við getum gert þetta í beinu framhaldi af þverpólitískum stuðningi á Íslandi þar sem ályktun okkar um langtímastuðning var afgreidd fyrir nokkrum vikum. Og byggt á þeim stuðningi sem þingið hefur samþykkt fór af stað samtal við Úkraínu sem við erum að skrifa undir hér í dag.“
Mæta báðir á friðarviðræður í júní
Ulf Kristersson, forsætisráðherra Svíþjóðar, er gestgjafi fundarins en aðrir þátttakendur eru Alexander Stubb, forseti Finnlands, Jonas Gahr Støre, forsætisráðherra Noregs, og Mette Frederiksen, forsætisráðherra Danmerkur.
„Þetta var líka tækifæri fyrir forsætisráðherra Norðurlandanna, forseta Finnlands til þess að eiga sameiginlegan fund með forseta Úkraínu og það var tækifæri til að deila upplýsingum um stöðu mála, ræða um friðarumleitanir Úkraínu sem við höfum stutt,“ segir Bjarni.
Rætt var um leiðtogafund Atlantshafsbandalagsins sem haldinn verður í sumar og einnig friðarráðstefnuna sem verður haldin í Sviss í júní.
„[Fundurinn í Sviss] verður tímamótafundur og stefnir í að um 100 ríki eða rúmlega það munu koma,“ segir Bjarni. Þá hafi Ísland líka stutt við að fulltrúar frá Malaví og Síerra Leóne mæti á fundinn.
Selenskí hefur aftur á móti útilokað þátttöku Rússa á friðarráðstefnunni sem fram fer í Sviss dagana 15. og 16. júní.
Fer fögrum orðum um Selenskí
Þetta er fyrsta sinn sem Bjarni fundar með Selenskí augliti til auglitis og ráðherrann fer fögrum orðum um Úkraínuforseta.
„Þannig að þetta var kærkomið tækifæri og minn fyrsti fundur beint með Selenskí. Það var gott að geta komið hingað til þess að staðfesta eindregin stuðning Alþingis við Úkraínu á þessum viðkvæmu og erfiðu tímum,“ segir Bjarni.
„Það er ótrúlegt að fylgjast með því æðruleysi og staðfestu sem hann hefur. Alveg eins og hann sé nýr og ferskur inn á þennan vettvang, ekki nokkurt þreytumerki að sjá, þvert á móti horf til framtíðar,“ bætir hann við.
„Þurfa að hafa tæki og tól til að verjast innrásinni“
Aðspurður hvort að stuðningurinn sem var ræddur á fundinum sé af hernaðarlegu eðli svarar Bjarni:
„Við höldum því alltaf til haga að við erum ekki í sömu færum og önnur Norðurlönd til að veita beinan slíkan [hernaðarlegan] stuðning, enda eina norðurlandaþjóðin sem er ekki með her.“
„En við reynum að hlusta á það sem mestu máli skiptir fyrir Úkraínumenn og studdum síðan nýlega frumkvæði Tékka við að útvega það sem mestu máli skiptir Úkraínsku þjóðina og her þeirra. Aðalumræðuefnið á fundi eins og þessum [er að] þau þurfa að hafa tæki og tól til að verjast innrásinni,“ bætir Bjarni við að síðustu.
Lögreglustjóri gerður afturreka
Kourani dæmdur í átta ára fangelsi
Þriðja tilboðið hugsanlega á leiðinni
Kourani áfrýjar dómnum
Frömdu hundruð stríðsglæpa í árásinni
Ráðist á bandaríska herstöð í Írak
Mikið magn af rauðvínspóstum eftir helgar
Kostnaður áætlaður 8,6 milljarðar