Gæti valdið uppskerubresti: Altjón á einum stað

Bjarkey Olsen Gunnarsdóttir matvælaráðherra segir að mikið sé um kaltjón í túnum bænda um landið sem ríkisstjórnin þurfi mjög líklega að bregðast við.

Í samtali við mbl.is að loknum ríkisstjórnarfundi segir Bjarkey að um stórmál sé að ræða. Kaltjónið finnist víða um land.

Stórmál fyrir marga bændur

Segir hún kalið í túnunum geta valdið uppskerubresti.

„Túnin verða í rauninni bara ekki nothæf sem þýðir það bara að það getur orðið uppskerubrestur og alls konar,“ segir Bjarkey.

„Þetta er bara stórmál fyrir marga bændur. Það er kal í Eyjafirði og það er kal fyrir austan og það er mikið kal og altjón í Svarfaðardal.“

Rætt um málið á ríkisstjórnarfundi

Bjarkey lagði í morgun fram minnisblað á ríkisstjórnarfundi varðandi málið. 

„Það virðist vera talsvert mikið um kal í túnum hjá bændum sem að ríkisstjórn gæti þurft að bregðast við, og mjög líklega þarf að bregðast við, sem getur kostað talsverða fjármuni.“

• Blogga um frétt