Halla ávarpar þjóðina klukkan fjögur
Setja bókamerki
Halla Tómasdóttir, nýkjörinn forseti Íslands, mun ávarpa þjóðina við heimili sitt klukkan fjögur í dag líkt og forverar hennar á Bessastöðum hafa gert daginn eftir kosningar.
Sigur Höllu í kosningunum var afgerandi en hún hlaut flest atkvæði í öllum sex kjördæmum landsins og var með yfir 30% fylgi í þeim öllum. Halla verður því sjöundi forseti Íslands en hún hlaut um 34% atkvæða.
Alls voru 266.935 manns á kjörskrá en 215.635 atkvæði voru greidd. Kjörsókn var því 80,8% og hefur ekki verið meiri síðan í forsetakosningunum árið 1996.
Hver er Halla?
Halla er alin upp á Kársnesi í Kópavogi og á ættir að rekja til Skagafjarðar og Vestfjarða. Hún er dóttir Kristjönu Sigurðardóttur þroskaþjálfa og Tómasar Þórhallssonar pípulagningameistara en hann lést árið 2008.
Halla er gift Birni Skúlasyni og eiga þau tvö börn, þau Tómas Bjart og Auði Ínu, sem bæði stunda háskólanám í New York. Þá á Halla tvær systur, þær Hörpu og Helgu, sem báðar eru leikskólakennarar.
Halla er frumkvöðull og rekstrarhagfræðingur, með meistaragráðu, en hún hóf starfsferil sinn í Bandaríkjunum hjá fyrirtækjunum Mars og Pepsi Cola. Hún kom að uppbyggingu Háskólans í Reykjavík þar sem hún stofnaði og leiddi meðal annars Opna háskólann.
Farsæll ferill
Halla hefur ávallt haft brennandi áhuga á forystu og frumkvöðlastarfsemi og kennt þúsundum nemenda á öllum aldri. Hún varð fyrst kvenna framkvæmdastjóri Viðskiptaráðs vorið 2006.
Ári síðar stofnaði hún, ásamt Kristínu Pétursdóttur, fjármálafyrirtækið Auður Capital. Segir á heimasíðu Höllu að fyrirtækið hafi lagt áherslu á ábyrgar fjárfestingar sem og að skila hagnaði á grunni góðra gilda. Halla kom í kjölfarið að stofnun Mauraþúfunnar sem hélt Þjóðfund árið 2009. Hjá Mauraþúfunni vann slembiúrtak þjóðarinnar að sameiginlegri framtíðarsýn og gildum.
Halla hefur síðastliðin sex ár verið forstjóri B Team þar sem hún starfar á heimsvísu að sjálfbærni, jafnrétti og ábyrgð í forystu. B Team vinnur með fyrirtækjastjórnendum og stjórnmálaleiðtogum að bættu siðferði. Einnig eru ríkar áherslur lagðar á réttlát og gagnsæ viðskipti og efnahag.
Þá er hún vinsæll alþjóðlegur fyrirlesari og hefur meðal annars stigið fjórum sinnum á TED-sviðið, ásamt því að halda fyrirlestra fyrir stærstu fyrirtæki heims.
Bjarni: „Útilokað að þetta geti gengið upp“
Fyrsti blaðamannafundurinn í heild sinni
Þetta eru ráðherrar ríkisstjórnarinnar
Var engin kristnitaka árið 1000?
„Tímabil aukinnar eldvirkni“
Segir að verið sé að svindla á Bandaríkjunum
Skattamál verði líklega „þeirra mesta klemma“
„Aðstæður í stjórnmálum geta breyst á einni nóttu“
