Guðrún Hafsteinsdóttir dómsmálaráðherra mun fara með minnisblað fyrir ríkisstjórn á morgun í tengslum við beiðni Guðmundar Inga Guðbrandssonar, félagsmála- og vinnumarkaðsráðherra, um að farið verði yfir verkferla lögreglu í kjölfar viðbragða hennar gagnvart mótmælendum við Skuggasund, þar sem ríkisstjórnarfundur var haldinn á föstudag.
Þetta staðfestir Fjalar Sigurðarson, upplýsingafulltrúi dómsmálaráðuneytisins, í samtali við mbl.is.
Að sögn Fjalars hefur lögreglustjórinn á höfuðborgarsvæðinu tilkynnt um atvikið til nefndar um eftirlit með lögreglu og þar með segir hann gagnasöfnun í tengslum við málið hafna.
Til að mynda sé þegar hafin öflun myndefnis úr búkmyndavélum þeirra lögreglumanna sem voru á vettvangi og úr öryggismyndavélum á svæðinu.
Skúli Þór Gunnsteinsson, formaður nefndar um eftirlit með lögreglu, sagði í samtali við mbl.is fyrr í dag að nefndin hefði samdægurs óskað eftir gögnum vegna málsins, en nefndin tók málið upphaflega til skoðunar að eigin frumkvæði.
Eins og mbl.is greindi frá á föstudag óskaði Guðmundur Ingi Guðbrandsson, þá starfandi forsætisráðherra, eftir því að farið yrði yfir verkferla og ákvarðanir lögreglu á vettvangi.
Nú er málið komið til nefndar um eftirlit með lögreglu og segir Fjalar það þar með komið í réttan og viðeigandi farveg.
„Þess vegna vill dómsmálaráðuneytið leggja fram þetta minnisblað til að árétta hvar málið er statt og hver eðlilegur ferill þess er,“ segir Fjalar til að útskýra hvers vegna dómsmálaráðherra muni fara með minnisblað vegna málsins fyrir ríkisstjórn á morgun.