Engar málefnalegar ástæður hjá Sjúkratrygginum Íslands

Samkeppniseftirlitið hefur skilað áliti og beinir tilmælum til heilbrigðisráðherra og Sjúkratryggingum Íslands um að gripið verði til aðgerða til að stuðla að bættri samkeppni á markaði fyrir myndgreiningar utan sjúkrahúsa.

Samkeppniseftirlitið telur stjórnvöld ekki hafa sýnt fram á málefnalegar ástæður sem réttlæta það að ríkið gangi ekki til samninga við Intuens Segulómun ehf. um greiðsluþátttöku vegna myndgreiningar á sama tíma og eldri samningar fyrirtækja á markaðnum hafa verið framlengdir.

Verði að njóta jafnræðis

Fyrirtækið Intuens Segulómun ehf. kvartaði til Samkeppniseftirlitsins þar sem því var synjað um samning um greiðsluþátttöku sem hindrar innkomu fyrirtækisins á markað fyrir myndgreiningu.

Tilmæli Samkeppniseftirlitsins fela í sér að Intuens skuli njóta jafnræðis gagnvart fyrirtækjunum sem þegar eru á markaðnum hvað greiðsluþátttöku varðar. Á markaðnum sem málið varðar starfi aðeins þrjú fyrirtæki og tvö af þeim hafa háa markaðshlutdeild.

Markaðurinn er skilgreindur sem myndgreiningarþjónusta utan sjúkrahúsa á höfuðborgarsvæðinu.

Búa yfir einu fullkomnasta tæki landsins

Í desember á síðasta ári leitaði Intuens til Samkeppniseftirlitsins vegna synjunarinnar. Taldi fyrirtækið hana fela í sér samkeppnishindrun og að grípa þyrfti til aðgerða til að tryggja að það geti haft starfsemi og veitt fyrirtækjum samkeppnislegt aðhald.

Fram kemur í málinu að Intuens búi yfir einu fullkomnasta tæki landsins á sviði segulómunar. Yrði ekkert gert í málinu þyrfti annað hvort að selja tækið úr landi, sem yrði neikvætt fyrir þjóðarbúið, eða selja til fyrirtækjanna sem eru á markaðnum sem myndi hafa skaðleg áhrif á samkeppni.

Sjúkratryggingar Íslands segja í málinu að stofnuninni sé einungis heimilt að ganga til samninga við fyrirtæki sé það hagkvæmt. Þá sé almennt ekki talið að þörf sé á samningsgerð ef framboð á heilbrigðisþjónustu sem niðurgreidd sé af stofnuninni fullnægi eftirspurn eftir þjónustunni.

Tilvísunum fjölgað um 80% síðustu ár

Samkeppniseftirlitið segir það frumforsendu fyrir aðila sem vilja hefja starfsemi á markaðnum sem um ræðir að gera samning um greiðsluþátttöku við Sjúkratryggingar Íslands. Innkoma Intuens sé til þess fallin að draga úr samþjöppun á markaðnum og hafa jákvæð áhrif á samkeppni.

Sjúkratryggingar Íslands telja að ekki sé þörf á að fjölga verkum á markaðnum en Samkeppniseftirlitið segist ekki geta fallist á það sjónarmið. Aukning sé greinileg á síðustu árum hvað tilvísanir til myndgreiningar varðar en þeim hefur fjölgað um 80% síðustu sjö ár. Aukin eftirspurn ætti að skapa rými fyrir nýtt fyrirtæki á markaði.

• Blogga um frétt