Björgunarskipið Þór sigldi í höfn í Vestmannaeyjum fyrir skömmu með skútu í togi sem lenti í töluverðum vandræðum djúpt suður af landinu í gærkvöldi.
Eins og mbl.is greindi frá í morgun barst Björgunarskipinu Þór útkall vegna skútunnar skömmu eftir miðnætti í gærkvöldi.
Skútan hafði lent í töluverðum vandræðum þar sem segl hennar rifnaði og eldsneytismagnið af svo skornum skammti að fólkið gerði ekki ráð fyrir að ná til Vestmannaeyja.
Þór var sendur af stað með eldsneyti en í millitíðinni varð skútan vélarvana og stjórnlaus vegna þess að hún fékk tóg í skrúfuna.
Þetta urðu þó ekki einu vandræðin því í morgun kom jafnframt smávægilegur leki á skútuna.
Eins og sést á myndunum tókst þó að koma skútunni í höfn í Vestmannaeyjum.