Milda dóm yfir kókaínsmyglara: Flutti inn 5 kíló

Landsréttur hefur mildað dóm yfir Edas Geraitis sem þarf nú aðeins að sæta fjögur ár í fangelsi í stað fimm ára, sem héraðsdómur hafði dæmt hann í. Geraitis flutti inn til landsins rétt rúmlega fimm kílógrömm af kókaíni.

Héraðsdómur dæmdi Geraitis í fimm ára fangelsi í febrúar fyrr á árinu. Geraitis áfrýjaði málinu til Landsréttar til að fá refsinguna mildaða, sem hann fékk. 

Geraitis játaði brot sín skýlaust en hann flutti inn rúmlega fimm kíló af kókaíni til söludreifingar á Íslandi í ágóðaskyni. Kókaínið var með 60-63% styrkleika.

Ekki hreyft við sakarkostnaði

Með vísan til forsendna hins áfrýjaða dóms og með hliðsjón af nýlegum dómum Landsréttar var refsing Geraitis ákveðin fangelsi í fjögur ár. Til frádráttar dæmdri refsingu kom gæsluvarðhald sem hann hafði sætt vegna málsins.

Ekki var hreyft við sakarkostnaði Geraitis sem hann hafði verið dæmdur til að greiða í héraði, en það voru rúmlega tvær milljónir króna.

Engu að síður þarf ríkissjóður að greiða fyrir lögfræðikostnaðinn í málinu fyrir Landsrétti.

• Blogga um frétt