Stofna viðbragðshóp vegna áhrifa kuldatíðar

Settur hefur verið á laggirnar viðbragðshópur á vegum stjórnvalda vegna erfiðleika sem skapast hafa í landbúnaði vegna kuldatíðar undanfarið.

Í viðbragðshópnum sitja fulltrúar matvæla- og innviðaráðuneyta, Bændasamtakanna, Ráðgjafarmiðstöðvar landbúnaðarins, almannavarna og lögregluembættanna á Norðurlandi vestra og eystra. Þetta kemur fram í tilkynningu á Stjórnarráðinu. 

Frétt af mbl.is

Kuldatíð tekur verulega á sálarlíf bænda

Kuldakastið þegar haft veruleg neikvæð áhrif

Í tilkynningunni segir að fleiri kunni að koma að verkefninu eftir því sem því vindur fram. Hópurinn hafi fundað í morgun en fyrir liggur að kuldakastið hefur þegar haft verulega neikvæð áhrif á starfsemi bænda, bæði til skemmri og lengri tíma.

Fyrsta skrefið í vinnu hópsins er að hafa samband við bændur á þeim svæðum þar sem ástandið er verst til að kortleggja og skipuleggja viðbrögð við bráðavanda eins og velferð og fóðrun búfjár sem komið hefur til vegna veðursins.

Bændur hafa haft frumkvæði að því á ákveðnum svæðum en nauðsynlegt er að fara yfir heildarstöðuna. Langtímaáhrif eins og á uppskeru og afurðir munu ekki verða ljós fyrr en líður á sumarið, jafnvel ekki fyrr en í haust.

Einnig liggur fyrir að verulegt kaltjón hefur orðið á ræktarlöndum á mörgum sömu svæðum og er vinna hafin vegna þess hjá Bjargráðasjóði. Bændasamtökin hafa sett upp sérstaka vefsíðu þar sem bændur geta nálgast upplýsingar um framvindu mála, að því er fram kemur í tilkynningunni. 

• Blogga um frétt