Kári Freyr Kristinsson
„Aðalverkefnið er að gera úrbætur á samgönguleiðum til og frá Grindavík,“ segir Jón Haukur Steingrímsson, jarðeðlisfræðingur hjá Eflu, í samtali við mbl.is eftir að hraun rann yfir Grindavíkurveg rétt norðan við varnargarðinn við Svartsengi í morgun.
„Með því að þessi leið [Grindavíkurvegur] fer verðum við að laga betur leiðirnar niður á Nesvegi og niður á Bláa lóns vegi og flóttaleiðir,“ segir Jón Haukur.
Unnið verður að því það sem eftir lifir dags.
Búið er að fylla í skarð í varnargarðinum sem er í grennd við Bláa lónið, en lóninu var lokað í morgun.
„Þetta er bara orðið hefðbundið viðbragð. Við erum búnir að loka þessu gati svo margoft síðan í desember, það er ekkert nýtt í því,“ svarar Jón Haukur spurður hvernig hafi gengið að fylla í skarðið sem var á varnargarðinum.
Hann segir að fimm til sex menn hafi unnið að því að fylla skarðið.
Jón Haukur segir að slökkviliðið sé nú að vinna að því að koma í veg fyrir gróðurelda á svæðinu.