Besta veðrið í dag og á morgun verður á Suður- og Vesturlandi. Almennt er gert ráð fyrir fínu veðri víða um land næstu daga, það mun hlýna talsvert í vikunni og því útlit fyrir betri tíð.
„Það getur verið víða um land að hitinn nái allt að 18 gráðum á nokkrum stöðum á Suðurlandi og svo þegar líður á vikuna á Norðurlandi,“ segir Katrín Agla Tómasdóttir, veðurfræðingur hjá Veðurstofu íslands, í samtali við mbl.is.
Kuldatíð hefur hrjáð bændur sérstaklega norðan- og austanlands undanfarna viku, en útlit er fyrir að henni sé loks að ljúka.
„Við erum að sjá fyrir endann á henni [kuldatíðinni] núna, það er að hlýna smám saman, en eins og í nótt er áfram næturfrost til fjalla austanlands. Þetta er smám saman að koma, það dregur alltaf meira og meira úr næturfrostinu,“ segir Katrín Agla.
Hvað vætu á þessum slóðum varðar er útlit fyrir suðlæga átt og þurrt norðan- og austanlands, þó einhver væta gæti orðið við austurströndina á fimmtudag.
Á Norðurlandi er útlit fyrir þurrt og bjart veður næstu daga.