„Ráðherrann er rangstæður“
Setja bókamerki
Bjarni Benediktsson forsætisráðherra tekur undir bréfaskrif dómsmálaráðherra til fjármálaráðuneytisins. Hann telur samt að ráðherrar hafi svigrúm til að vekja athygli lögreglunnar á „einhverjum stöðum“.
Þorbjörg Sigríður Gunnlaugsdóttir, þingkona Viðreisnar, beindi fyrirspurn sinni að Bjarna Benediktssyni forsætisráðherra í óundirbúnum fyrirspurnartíma á Alþingi í dag.
Snerist fyrirspurnin um bréf dómsmálaráðherra til fjármálaráðuneytisins um afskipti hins síðarnefnda að rannsókn lögreglu á netsölu áfengis.
Ráðherrar skrifa sín á milli
Sigurður Ingi Jóhannsson, fjármála- og efnahagsráðherra, sendi lögreglunni á höfuðborgarsvæðinu í bréf í vikunni vegna netsölu áfengis til neytenda hér á landi í kjölfar erindis sem ráðuneytinu barst frá heilbrigðisráðherra um þróun áfengissölu.
Guðrún Hafsteinsdóttir dómsmálaráðherra skammaði Sigurð Inga í bréfi sem hún sendi ráðuneytinu. Hún sagði að ráðherrar ríkisstjórnarinnar ættu ekki að hafa afskipti af því hvernig mál væru tekin til rannsóknar sem sakamál.
„Tekur forsætisráðherra ekki örugglega undir með dómsmálaráðherra hvað hennar afstöðu varðar? Búum við nokkuð í landi þar sem ráðherrar telja það beinlínis skyldu sína að senda lögreglunni bréf eins og þessi – með ábendingum um mál til að skoða?“ spurði Þorbjörg.
Bjarni svaraði og sagði að ekkert í bréfi dómsmálaráðherra gæti verið umdeilt. „Það breytir því ekki að það er eitthvert svigrúm fyrir ráðherra, eftir atvikum forstöðumenn stofnana, til að vekja athygli á einhverjum stöðum og það er það sem hæstvirtur fjármálaráðherra taldi sig vera að gera,“ sagði forsætisráðherra enn fremur.
„Rangstæður“
Þorbjörg steig aftur upp í pontu. Kallaði þá stöðu sem upp var komin „kennslubókardæmi um pólitísk afskipti af lögreglu“ sem ekki væri hægt að skilja öðruvísi en að ráðherra þætti tilefni til að lögregla hefji skoðun á ákveðnu máli.
„Ráðherrann er rangstæður,“ segir viðreisnarkonan um Sigurð Inga. „Og ég vona að dómsmálaráðherra sé ekki eini ráðherrann sem stendur vörð um þessar grundvallarreglur.“
Hún bendir á að þetta sé ekki í fyrsta sinn sem slík mál hafa komið upp. Nefndi hún í því samhengi upplýsingagjöf lögreglu til fjölmiðla í kjölfar frétta um rannsókn lögreglu á ætluðum lögbrotum í Ásmundarsal, þar sem annar Bjarni hafði þá verið viðstaddur.
„Forseti, ríkisstjórnin verður að hætta að hringja í lögregluna eða senda henni bréf. Búum við ekki í réttarríki?“
Athyglisvert að netverslanir séu ódýrari en ÁTVR
Bjarni svarði Þorbjörgu að betra væri að verja tíma í hið lagalega álitaefni áfengissölunnar frekar en „þessi skoðanaskipti“.
„Reyndar er athyglisverð staðreynd að netverslun virðist geta boðið áfengi á lægra verði en ÁTVR. Það er athyglisverð staðreynd og það hefur myndast ákveðið lagalegt tómarúm vegna þess að gömul lög tók ekki tillit til þess með hvaða hætti netverslun gæti rutt sér til rúms á þessum vettvangi,“ sagði hann enn fremur.
Og nú virðist heilbrigðisráðherra einnig ætla að blanda sér í drykk. Hann sendi í dag fjármálaráðuneytinu bréf þar sem sagði að með netsölu áfengis væri grafið undan gildandi sölufyrirkomulagi á áfengi og grundvallarmarkmiðum stefnu stjórnvalda í lýðheilsumálum ógnað.
Fyrsti blaðamannafundurinn í heild sinni
„Þetta er ríkisstjórn almannahagsmuna“
Bjarni: „Útilokað að þetta geti gengið upp“
Lát hjóna í Neskaupstað: Ákæra gefin út
Funda með þingflokkum
Skattamál verði líklega „þeirra mesta klemma“
