Þrjú innbrot á skömmum tíma

Tilkynnt var um innbrot í verslunarhúsnæði í Reykjavík laust fyrir klukkan hálfþrjú í nótt.

Farið hafði verið inn í húsnæði þar sem starfsemi var ekki í gangi og virtust þjófarnir ekki hafa haft erindi sem erfiði.

Upp úr klukkan hálffjögur í nótt var tilkynnt um innbrot í annað húsnæði í miðbæ Reykjavíkur. Búið var að spenna upp glugga en ekki er vitað hvort þjófarnir komust á brott með einhver verðmæti þar sem lögreglan mætti á vettvang skömmu síðar.

mbl.is/Eggert Jóhannesson

Lögreglan fékk tilkynningu um þriðja innbrotið um fjögurleytið í nótt. Þá var tilkynnt um innbrot í verslun og er málið í rannsókn.

Ekki er vitað hvort innbrotin þrjú tengist en rannsókn þeirra er á frumstigi.

Í annarlegu ástand við fjölbýlishús

Tilkynnt var um einstakling í annarlegu ástandi fyrir utan fjölbýlishús í Reykjavík um tvöleytið í nótt. Skömmu síðar bárust lögreglu fleiri tilkynningar um einstaklinginn. Að lokum þurfti að vista hann í fangageymslu vegna ástands, að því er segir í dagbók lögreglunnar á höfuðborgarsvæðinu vegna verkefna frá klukkan 17 í gær til klukkan 5 í morgun.

Um miðnætti var einn einstaklingur stöðvaður í akstri grunaður um akstur undir áhrifum ávana- og fíkniefna. Hann var handtekinn og fluttur á stöð í hefðbundið ferli og sýnatöku.

• Blogga um frétt