Ekki er búist við því að slökkviliðsmenn í Grindavík haldi áfram að kæla hraunið sem náði yfir varnargarðinn við Sýlingarfell. Hraunrennslið er hægfara en virknin í síðasta gígnum í eldgosinu við Sundhnúk helst samt stöðug.
Hraunspýja skreið yfir varnargarð í gær og var gripið til þess ráðs að kæla hraunið.
„Eins og staðan er núna stafar ekki hætta af að þetta fari lengra,“ segir Hjördís Guðmundsdóttir, samskiptastjóri almannavarna, í samtali við mbl.is. Slökkviliðið hafi náð að stöðva rennsli hraunspýjunnar um klukkan 19 í gærkvöldi.
Í raun var hraunkælingin gerð í tilraunaskyni. Viðbragðsaðilar vildu sjá hvort hægt væri að nota búnað slökkviliðsins til þess að kæla hraunið.
Almannavarnir eiga reyndar von á að fá sérstakan hraunkælingarbúnað til landsins, þó ekki sé vitað hvenær hans sé að vænta, að sögn Hjördísar.
Magnús Tumi Guðmundsson, prófessor í jarðeðlisfræði við HÍ, bendir á í samtali við mbl.is að þetta sé í fyrsta sinn sem hraunkæling hefur verið prófuð síðan í Heimaeyjargosinu 1973. Hraunkælingin í Vestmannaeyjum hafi þó verið mun umfangsmeiri.
„Þetta er á litlum skala,“ segir hann um hraunkælinguna. „Miðað við það sem gert var í Vestmannaeyjum er þetta pínulítið enn sem komið er.“
Myndaðist greiðari leið fyrir hraunið upp á varnargarðinn eftir að hraunpollur suðaustan Sýlingarfells brast laugardaginn 8. júní og hraunrennslið tók skyndiáhlaup yfir Grindavíkurveg.
Þá náði hraunstraumurinn frá eldgosinu í Sundhnúkagígaröðinni sömu hæð og varnarveggurinn og lítil hrauntunga skvettist upp á L1-varnargarðinn, sem er norðan Svartsengis en austan Grindavíkurvegar.
„Fyrir nokkrum dögum var hraunið búið að ná það hátt að það var komið upp á garðinn. Svo kom þarna smá spýja yfir hann,“ segir Magnús Tumi.
Böðvar Sveinsson, náttúruvársérfræðingur á Veðurstofu Íslands, segir við mbl.is að virknin í gígnum á Sundhnúkagígaröðinni sé stöðug.
Þá sé hraunrennslið enn hægt í gegnum hraunpollinn sunnan Sýlingarfells, og nokkuð stöðugt. Engar breytingar er að sjá á skjálftavirkni.
Við erum ekkert að búast við miklu áhlaupi strax?
„Nei. Ekkert frekar. En svo kannski líka. Það er náttúrulega erfitt að hemja þetta. Þetta fer bara sínar leiðir,“ svarar Böðvar.