Innlent | mbl | 19.6.2024 | 10:07 | Uppfært 11:09

Greiða atkvæði um vantrauststillöguna á morgun

Vænta má þess að niðurstaða verði fengin í tillöguna um hádegi á morgun. mbl.is/Eggert Jóhannesson

Þingmenn munu á morgun greiða atkvæði um vantrauststillögu Miðflokksins á hendur Bjarkeyju Olsen Gunnarsdóttur matvælaráðherra.

Þetta segir Birgir Ármannsson, forseti Alþingis, í samtali við mbl.is.

Hann gerir ráð fyrir því að umræður um tillöguna hefjist rétt upp úr klukkan 11 og svo í kjölfarið verður kosið.

„Ég átti fund með þingflokksformönnum í gær og það var niðurstaðan. Sem sagt að vantrauststillagan verður rædd og afgreidd í einni lotu, eins og alltaf er gert. Gerum ráð fyrir því að þetta byrji upp úr 11 á morgun og verði búið í hádeginu,“ segir Birgir.

Frétt af mbl.is

Leggja fram vantrauststillögu í dag

Óljóst hvað allir þingmenn Sjálfstæðisflokksins gera

Þingmenn Samfylkingarinnar, Viðreisnar, Flokks Fólksins og Miðflokksins hafa gefið það út að flokkarnir muni styðja tillöguna.

Björn Leví Gunnarsson, þingmaður Pírata, sagði í samtali við mbl.is í gær að hann hallaðist að því að kjósa með tillögunni og sagði tillöguna vera málefnalega.

Ingibjörg Isaksen, Þingflokksformaður Framsóknar, sagði í samtali við mbl.is í gær að allir þingmenn Framsóknar myndu verja Bjarkeyju vantrausti. Ekki liggur fyrir hvort að allir þingmenn Sjálfstæðisflokksins muni verja Bjarkeyju vantrausti.