Laun æðstu embættismanna hækki um 66 þúsund

Fyrsta umræða er fyrirhuguð á Alþingi í dag um breytingu á ýmsum lögum vegna hækkunar launa æðstu embættismanna þjóðarinnar.

Samkvæmt frumvarpinu eiga laun forseta, forsætisráðherra og annarra ráðherra og þingmanna að hækka um 66 þúsund krónur á mánuði frá og með 1. júlí næstkomandi.

Það sama gildir meðal annars um laun seðlabankastjóra, forseta Hæstaréttar, forseta Landsréttar, ríkissaksóknara, vararíkissaksóknara og héraðssaksóknara.

Frétt af mbl.is

Stjórnmála- og embættismenn hækka í launum

„Hinn 1. júlí ár hvert skulu laun tiltekinna starfa samkvæmt sérákvæðum í lögum taka breytingum sem nemur meðaltali reglulegra launa starfsmanna ríkisins fyrir næstliðið almanaksár sem reiknað er af Hagstofu Íslands. Í þessum hópi eru þjóðkjörnir fulltrúar (forseti Íslands og alþingismenn), ráðherrar, dómarar, saksóknarar, lögreglustjórar, ráðuneytisstjórar, seðlabankastjóri, varaseðlabankastjórar og ríkissáttasemjari,” segir í greinargerð frumvarpsins.

Í frumvarpinu er lagt til að laun þeirra sem taka laun samkvæmt lagaákvæðum hækki um 66 þúsund á mánuði í stað 8% en launavísitala ríkisstarfsmanna viðmiðunarárið 2023 er 8,0% samkvæmt Hagstofu Íslands.

„Kostnaður ríkissjóðs af 8% hækkun launa þess hóps sem frumvarpið nær til hefði orðið um 424 millj. kr. á ári en kostnaður af 66.000 kr. hækkun á mánuði er áætlaður 186 millj. kr. á ári. Útgjöld ríkissjóðs verða því um 238 millj. kr. lægri á ársgrundvelli en ella hefði verið, verði frumvarpið óbreytt að lögum.”

• Blogga um frétt