Sameinað sveitarfélag Vesturbyggðar og Tálknafjarðar mun bera heitið Vesturbyggð.
Þetta staðfestir Gerður Björk Sveinsdóttir, starfandi sveitarstjóri sameinaðs sveitarfélags Vesturbyggðar og Tálknafjarðar, í samtali við mbl.is. Ákvörðunin var tekin á sveitarstjórnarfundi sameinaðs sveitarfélags sem lauk rétt í þessu.
Við ákvörðunina hafði sveitastjórn til hliðsjónar skoðunarkönnun sem gerð var meðal íbúa sveitarfélagsins, þar sem íbúar fengu að velja á milli sex heita. Það voru Suðurfjarðabyggð, Kópsbyggð, Vesturbyggð, Barðsbyggð, Látrabyggð og Tálknabyggð.
Gerður segir ákvörðunina ekki hafa verið erfiða fyrir sveitarstjórnina þar sem niðurstaða skoðunarkönnunarinnar hafi verið afgerandi.
„Það var þannig að, bæði í tillögunum sem komu fram þá kom þessi tillaga lang oftast fram, og eins voru það yfir 90% sem að kusu nafnið Vesturbyggð,“ segir Gerður og útskýrir að þrátt fyrir að skoðunarkönnunin hafi einungis verið ráðgefandi þá hafi niðurstaða hennar verið afgerandi.
„Það var ákveðið að fara í þetta ferli þannig að það væri öruggt að það væri stuðningur um nafnið,“ segir Gerður að lokum.