Stjórnarandstaðan sameinuð: 5 breytingartillögur

Fulltrúar allra stjórnarandstöðuflokka í velferðarnefnd Alþingis hafa lagt fram sameiginlegar breytingartillögur við frumvarp ríkisstjórnarinnar um endurskoðun á örorkulífeyriskerfinu.

„Þetta snýst um að enginn öryrki verði skilinn eftir,“ er haft eftir Jóhanni Páli Jóhannssyni, þingmanni Samfylkingar, í tilkynningu frá flokknum um málið.

Frétt af mbl.is

Réttlátara kerfi: Flestir fá 30 þúsund eða meira

Jóhann Páll er fyrsti flutningsmaður tillögunnar en aðrir flutningsmenn eru Arndís Anna K. Gunnarsdóttir, þingmaður Pírata, Bergþór Ólason, þingmaður Miðflokksins, Guðbrandur Einarsson, þingmaður Viðreisnar, og Guðmundur Ingi Kristinsson, þingmaður Flokks fólksins.

„Þess vegna höfum við í stjórnarandstöðunni sameinast, fulltrúar allra flokka, um að leggja til breytingartillögur við örorkufrumvarp ríkisstjórnarinnar. Með breytingunum verjum við kjör öryrkja sem búa einir, tryggjum að enginn lækki beinlínis í tekjum og gætum betur að sjálfsákvörðunarrétti öryrkja á vinnumarkaði svo dæmi séu nefnd,“ er haft eftir Jóhanni.

Frétt af mbl.is

„Við erum ekki að refsa fólki fyrir að vinna“

Risastórt velferðarmál

Stjórnarandstaðan leggur til fimm breytingar á frumvarpinu og áætlaður kostnaður er undir milljarði á ári, að er kemur fram í tilkynningunni.

1. Lagt til að fallið verði frá því fyrirkomulagi að fjármagnstekjur maka hafi áhrif á útreikning örorkulífeyris.
2. Hnykkt á því að enginn öryrki sem hefur þegar fengið örorkumat sé skylt að fara í svokallað samþætt sérfræðimat.
3. Alþingi fái skýrslu um útfærslu á samþættu sérfræðimati sem á að koma í stað örorkumats en er enn algjörlega óútfært.
4. Lagt til að fjárhæð heimilisuppbótar verði 756.000 kr. á ári frekar en 684.000 kr., þ.e. 6.000 kr. hærri á mánuði en frumvarpið gerir ráð fyrir.
5. Lagt til að öryrki í atvinnuleit fái aukið svigrúm til þess að leita sér að því starfi sem hann helst kýs án þess að komið geti til niðurfellingar virknistyrks. Miðað verði við sex mánuði í þessum efnum en ekki tvo.

„Þetta er risastórt velferðarmál sem varðar ekki aðeins alla öryrkja Íslands heldur einnig vinnandi fólk sem getur misst starfsgetu í framtíðinni, ef það veikist til dæmis eða lendir í slysi,“ er haft eftir Jóhanni.

• Blogga um frétt