Ammoníakslekinn – „Þetta hefði getað verið verra“

„Vindáttin er þannig hagstæð að lyktin leitar yfir hafnarsvæðið, ekki yfir þorpið. Þetta er mest alveg í nágrenni við frystihúsið sjálft, þannig það er óhætt að vera á hafnarsvæðinu en það er kannski ekki æskilegt nema þú eigir erindi.“

Þetta segir Gerður Björk Sveinsdóttir, starfandi sveitarstjóri sameinaðs sveitarfélags Vesturbyggðar og Tálknafjarðar, í samtali við mbl.is.

Slökkviliðinu í Vest­ur­byggð barst út­kall um þrjú­leytið í nótt vegna ammoníaksleka frá gömlu frysti­húsi við höfn­ina á Tálknafirði.

Frétt af mbl.is

Hafnarsvæði lokað vegna ammoníaksleka

Fólki stafi ekki hætta af ammoníakinu

Um 260 manns búa á Tálknafirði en eins og fyrr segir þá er vindáttin hagstæð og leitar lyktin því ekki yfir íbúabyggð. 

„Þetta hefði getað verið verra hefði vindáttin leitað yfir þorpið, það mætti kannski segja það. Það er tiltölulega gott veður. Það er lítill vindur en nægilegur þannig að þetta dreifist yfir höfnina, en fólki stafar ekki hætta af ammoníakinu,“ segir hún aðspurð.

Heilmikil lykt inni í húsinu

Davíð Rún­ar Gunn­ars­son­ slökkviliðsstjóri sagði í samtali við mbl.is í morgun að ekki væri búið að staðsetja lekann.

Ammoní­aks- og kæli­kerfi eru í þessu húsi, sem er ekki leng­ur notað sem frysti­hús, auk þess sem kæl­ar og fryst­ar eru í hús­inu við hliðina.

„Í nótt þá var megn stækja og það tók á móti okk­ur hvít­ur reyk­ur frá ammoní­aki. Sem bet­ur fer fór það beint út á sjó,” sagði Davíð Rún­ar og bæt­ti við að enn væri heil­mik­il lykt inni í hús­inu og þar fyr­ir utan.

„Núna erum við ann­ars veg­ar að leita að lek­an­um og hins veg­ar að reykræsta.”

• Blogga um frétt