Innlent | mbl | 20.6.2024 | 11:21

Tvö félög Quang Lé úrskurðuð gjaldþrota

Quang Lé rak meðal annars veitingastaðina Wok on, en félagið utan um reksturinn hefur núna verið úrskurðað gjaldþrota.

Félögin Wokon ehf. og EA17, sem bæði voru í fullri eigu Quang Lé, eða Davíðs Viðarssonar, hafa verið úrskurðuð gjaldþrota. Auglýsingar um gjaldþrotin eru birt í Lögbirtingablaðinu í dag, en þó er sitt hvor skiptastjórinn með þrotabúin.

Quang Lé sat í varðhaldi í 14 vikur vegna rannsóknar lögreglu á meintu mansalsmáli, peningaþvætti, brotum á atvinnuréttindum útlendinga og skipulagðri brotastarfsemi, en var látinn laus í síðustu viku. Hann var hins vegar úrskurðaður í 12 vikna farbann.

Frétt af mbl.is

Quang Le laus úr haldi en settur í farbann

Gjaldþrot félaganna kemur í kjölfar þess að lögregla frysti bankareikninga og kyrrsetti aðra fjármuni í tengslum við rannsókn á fyrirtækjum sem tengd eru Quang Lé. Vísir greindi fyrst frá gjaldþrotinu í dag.

Félögin hafa ekki skilað ársreikningum fyrir síðasta ár, en samtals voru þau með um 175 milljónir í eignir samkvæmt ársreikningi 2022. Var Wokon með jákvætt eigið fé um 60 milljónir, en EA17 neikvætt eigið fé upp á 6 milljónir.

Frétt af mbl.is

Félag Quang Lé gjaldþrota

Wokon ehf. var upphaflega í eigu Darko ehf. og HH81 ehf., en það voru félög í eigu Ísabellu Ósk Sigurðardóttur og Harðar Harðarsonar, en Ísabella er systir Kristjáns Ólafs Sigríðarson, sem var stofnandi og í forsvari fyrir samnefnda veitingastaði og í stjórn félagsins.

Áður hafði Quang Lé átt hlut í tveimur Wok on veitingastöðum á höfuðborgarsvæðinu og voru fyrir utan starfsemina sem Kristján Ólafur var með.

Frétt af mbl.is

Lögreglan með 189 milljóna veð í Herkastalanum

Fyrirtækið var síðar selt til Quang Lé, en það er eitt af fjölmörgum veitinga- og fasteignafélögum sem voru í eigu hans. Meðal þeirra má nefna Vietnam Cuisine ehf., sem var tekið til gjaldþrotaskipta fyrr í þessum mánuði, Vietnam market ehf., NQ fasteignir, Vietnam Restaurant og Vy-þrif.

Wokon.ehf var með rekstur á 7 veitingastöðum á höfuðborgarsvæðinu og á Akureyri en að auki sáu utanaðkomandi rekstaraðilar um rekstur tveggja staða á landsbyggðinni.