Aðalmeðferð í Bátavogsmálinu hefst í dag
Setja bókamerki
Aðalmeðferð í Bátavogsmálinu hefst í dag og stendur yfir næstu þrjá daga í Héraðsdómi Reykjavíkur.
Hin 42 ára gamla Dagbjört Guðrún Rúnarsdóttir er ákærð fyrir að hafa orðið sambýlismanni sínum á sextugsaldri að bana á heimili þeirra í Bátavogi í Reykjavík þann 23. september.
Dagbjört er talin hafa beitt manninn margþættu ofbeldi í aðdraganda andlátsins, dagana 22. og 23. september, þar á meðal höggum og/eða spörkum og þrýstingi á andlit, klof, bol, handleggi og fótleggi auk þess að taka hann hálstaki og taka fast um, snúa upp á og beygja fingur hans. Maðurinn hlaut af margvíslega áverka á höfði og líkama.
Myndefni sem var tekið upp á síma parsins þessa tvo daga sýnir Dagbjörtu valda manninum ítrekuðum líkamsmeiðingum. Þá heyrðu nágrannar öskur í karlmanni sömu daga.
Að minnsta kosti 5 ára fangelsi
Við fyrirtöku málsins í síðasta mánuði kom fram að matsmönnum bæri ekki saman um það hversu mikinn þátt heilsufar hins látna hafi átt þátt í dauða hans. Þannig telur annar matsmaður í málinu það koma til greina að banvænt blóðsykursfall hafi átt þátt í dauða mannsins en hinn ekki.
RÚV fékk staðfest frá embætti héraðssaksóknara í lok maí að ákæruvaldið ætli ekki að fara fram á yfirmat dómskvadds réttarmeinafræðings vegna þessa.
Dagbjört er ákærð fyrir brot á 211 gr. hegningarlaga og verði hún sakfelld getur hún átt yfir höfði sér að minnsta kosti fimm ára fangelsi.
Þá er þess krafist að hún greiði samtals 16 milljónir í miskabætur til aðstandenda hins látna, auk tveggja milljóna króna í útfararkostnað.
Dagbjört neitaði sök þegar málið var þingfest í janúar.
Lát hjóna í Neskaupstað: Ákæra gefin út
Ný ríkisstjórn kynnt á morgun
Bjarni: „Útilokað að þetta geti gengið upp“
„Tímabil aukinnar eldvirkni“
„Þetta er ríkisstjórn almannahagsmuna“
Alvarleg netárás á Wise
