Innlent | mbl | 26.6.2024 | 18:10

Allt að 500 nýjar íbúðir í Grafarvogi

Einar Þorsteinsson borgarstjóri kynnti stöðu átaksverkefnis í íbúðauppbyggingu fyrr í dag. Ljósmynd/Aðsend

Allt að 500 íbúðir munu rísa í Grafarvogi á næstu árum ef tillögur sem Einar Þorsteinsson borgarstjóri kynnti í dag ganga eftir. Vonir standa til að úthlutun lóða geti hafist strax á næsta ári.

Einar Þorsteinsson boðaði til blaðamannafundar í dag þar sem hann kynnti stöðu átaksverkefnis í húsnæðismálum sem sett var af stað þegar hann tók við sem borgarstjóri.

Settur var á laggirnar hópur til að leita allra leiða til að hraða húsnæðisuppbyggingu í Reykjavík og var niðurstaðan að finna minni lóðir til að byggja á í úthverfum borgarinnar samhliða stærri uppbyggingarverkefnum í vesturhluta hennar.

Fyrsti áfangi þessarar uppbyggingar mun fara fram í Grafarvogi en síðari áfangar í Breiðholti, Grafarholti og Úlfarsárdal.

Blettir fundust hér og þar

„Samhliða því að reyna að greiða úr ýmsum flækjum í tengslum við stærri uppbyggingarverkefni vestar í borginni [...] fórum við að rýna það hvernig við getum búið til lóðir hérna í úthverfunum sem styrkja innviði hverfanna og mæta óskum smærri uppbyggingaaðila, meðal stórra og lítilla verktaka sem vantar kannski eina lóð undir eitt hús, parhús, raðhús eða minni blokk,“ segir Einar í samtali við mbl.is.

Hann segir að farið hafi verið ítarlega ofan í skipulag hverfanna sem um ræðir og að blettir hafi fundist hér og þar.

„Þetta eru allt að 500 íbúðir sem við sjáum fyrir okkur að geti byggst hér upp [í Grafarvogi],“ segir Einar. Hann tekur þó fram að það sé með fyrirvara um íbúasamráð og athugasemdir sem koma frá nærumhverfinu.

Hér má sjá þær lóðir sem verður mögulega byggt á í Grafarvogi. Skjáskot/Reykjavíkurborg

Grafarvogurinn mun ekki gjörbreytast

„Lykilatriðið er að byggja og hér gefst okkur tækifæri til að byggja með nýjum hætti sem við höfum ekki gert í nokkurn tíma í Reykjavík,“ segir Einar og útskýrir að hugmyndin sé að byggja húsnæði sem er í samræmi við hverfin, parhús, raðhús, einbýlishús og minni fjölbýli.

„Við vitum að Grafarvogsbúar myndu ekki vilja sjá Grafarvoginn gjörbreytast. Það verður byggt hér í þessu samfellda byggðarmynstri.“

Spurður hvort að einhver tímarammi liggi fyrir um hvenær þessi ubbygging muni hefjast segir Einar:

„Nú hlaupum við af stað og vonumst til þess að snemma á næsta ári getum við farið að úthluta lóðum hérna í Grafarvoginum úr þessu verkefni.“

Litið til lausra skólaplássa

Þegar kom að því að ákveða í hvaða hverfum ætti að ráðast í uppbyggingunna var litið til þess hvar nemendapláss væri í grunnskólum svo ekki þyrfti að byggja nýja skóla.

Spurður hvort ástæðan fyrir lausum plássum í umræddum skólum sé skortur á íbúðum í hverfunum segir Einar svo ekki vera:

„Ég held að aðal ástæðan er að börnin eldast og fara í menntaskóla en það er eftirspurn eftir nýju húsnæði í Grafarvogi eins og alls staðar.“

„Nú erum við að byggja fyrir alla tekjuhópa og mæta þannig óskum fólksins,“ segir Einar.

Lögð er áhersla á uppbyggingu í hverfum með laus pláss í grunnskólum. Skjáskot/Reykjavíkurborg

Búið að jafna heildar íbúðauppbyggingu í fyrra

Þá bendir Einar á að íbúðum sem farið hafa í byggingu í borginni það sem af er ári hefur fjölgað.

„Svo má halda því til haga að á þessu ári hefur nýjum íbúðum sem hafa farið í byggingu fjölgað um tæplega 400 og fyrri helmingur þessa árs er að fara mun hraðar á stað en allt síðasta ár,“ segir Einar og bætir við:

„Við erum eiginlega búin að jafna heildar íbúðauppbyggingu í fyrra núna á fyrstu sex mánuðunum.“