Innlent | mbl | 26.6.2024 | 15:51

Engar brunabjöllur hringdu

Útivist er í austurhluta Höfðatorgs. mbl.is/Anton

Engar brunavarnabjöllur hringdu á skrifstofu ferðafélagsins Útivistar í Katrínartúni 4 á Höfðatorgi, þegar eldsvoði varð í veitingasal þar í dag.

Frá þessir segir Þórdís Sigurðardóttir, sem var að störfum á skrifstofunni þegar eldurinn kom upp, í samtali við blaðamann mbl.is.

Hún segir þó að brunavarnabjöllur hafi hringt frammi á gangi, sem nokkur fyrirtæki deila aðgengi að. Það hafi þó ekki verið það sem dreif þau út sem voru á skrifstofunni.

Myndir innan úr Katrínartúni eftir eldsvoðann

Miklar skemmdir urðu eftir eldsvoða á Höfðatorgi í dag. mbl.is/Anton

Hoppuðu á gluggann

„Það komu tvær konur hoppandi á gluggann og bönkuðu og létu okkur vita að það væri kviknað í,“ segir Þórdís. Á sama tíma var farið að finnast lykt af reyknum inni á skrifstofu Útivistar.

„Við fórum bara út og það var reykmökkur yfir öllu hérna úti, slökkviliðið á leiðinni og allir komnir út sem eru í þessu húsi.“

Mörg hundruð manns hafi staðið úti og beðið eftir fregnum af slökkvistarfinu.

Eldsvoði á Höfðatorgi: „Þetta eru miklar skemmdir“

Loka vegna slæmra loftgæða

Ekki leið klukkustund þangað til að Þórdísi og samstarfsfélaga hennar var aftur hleypt inn í þann hluta húsnæðisins sem Útivist er til húsa.

Þórdís var búin að vera á skrifstofunni í um tvær klukkustundir eftir brunann þegar blaðamaður talaði við hana. Þá stóð til að fara að skella í lás þann daginn vegna slæmra loftgæða á skrifstofunni, en opnað verður aftur á morgun.