Ríkislögreglustjóri hefur til skoðunar hvort skilgreina eigi nýnasistasamtökin Norðurvígi sem hryðjuverkasamtök.
mbl.is greindi frá því fyrr í mánuðinum að bandarísk stjórnvöld hefðu skilgreint Norrænu mótstöðuhreyfinguna, eða nýnasistasamtökin Norðurvígi eins og hreyfingin kallast á Íslandi, sem hryðjuverkasamtök.
„Varðandi Norðurvígi og skilgreiningu á því þá barst Greiningardeild RLS í lok maí upplýsingar frá bandarískum stjórnvöldum þess efnis að norræna mótspyrnuhreyfingin Norðurvígi, yrði skilgreind sem hryðjuverkasamtök þar í landi. Embættið tekur slíkar ábendingar ávallt til skoðunar hverju sinni,“ segir í skriflegu svari frá embætti ríkislögreglögreglustjóra við fyrirspurn mbl.is en spurt var hvort til stæði að fylgja fordæmi Bandaríkjamanna.
Ákvörðun Bandaríkjamanna var tekin vegna ofbeldisstarfsemi hreyfingarinnar sem beinist einkum að gyðingum, útlendingum og hinsegin fólki.
Norðurvígi starfar í Svíþjóð, Noregi, Danmörku og Íslandi en einnig í Finnlandi, þar sem samtökin hafa verið bönnuð frá árinu 2020.
Ríkislögreglustjóri kveðst aftur á móti ekki geta tjáð sig um hversu marga hér á landi embættið telur hafa tengsl við öfgahreyfingar eða hryðjuverkasamtök.