Sæþór Már Hinriksson
„Þetta er auðvitað í takt við þær væntingar sem við höfum haft að verðbólgan væri að fara niður,“ segir Sigurður Ingi Jóhannesson fjármálaráðherra í samtali við mbl.is.
Verðbólga mælist nú 5,8% og hefur ekki mælst lægri síðan í janúar 2022.
„Við vitum hins vegar ennþá að það er þensla í samfélaginu og þetta er ennþá sameiginlegt verkefni okkar allra að ná niður verðbólgunni. En þetta er sannarlega jákvæð teikn um að við séum á réttri leið,“ segir Sigurður.
Þrátt fyrir að verðbólga sé á niðurleið segir Sigurður mikilvægt að halda áfram með aðhaldið. Í undirbúningi séu aðhaldssöm fjárlög sem lögð verða fram í haust.
„Þau verða með þessa skýru mynd á að við ætlum að ná þessum árangri að ná niður verðbólgu og vöxtum þannig að þau eru aðhaldssöm.“