Í nýlegri könnun sem Prósent framkvæmdi kom fram að 15% Íslendinga hafa farið eða telja sig líkleg til að fara í Parísarhjólið sem stendur við Reykjavíkurhöfn. Einar Þorsteinsson, borgarstjóri Reykjavíkur, telur þessa tölfræði vera góða.
„Það bjóst enginn við því að allir landsmenn myndu fara í þetta Parísarhjól og það eru 15% landsmanna segist líkleg eða sjái fyrir sér að fara í hjólið, það er hátt í 60 þúsund manns," sagði Einar í samtali við mbl.is.
Ætlið þið að gera þetta aftur næsta sumar?
„Það verður bara að koma í ljós, þetta var tilraunaverkefni úr sumarið og bara ein leið til þess að gera borgina skemmtilegri og bjóða upp á aukna afþreyingu fyrir landsmenn og höfuðborgarbúa,“ segir Einar.
„Miðað við þessa könnun þá sýnist mér þetta fá bara nokkuð góð viðbrögð,“ segir hann að lokum.