Innlent | Sunnudagsblað | 29.6.2024 | 8:00

Þótti ekki embættinu til sóma

Brjóstahaldarargirðingin undir Eyjafjöllum hefur vakið athygli vegfarenda, svo mikla athygli að Vegagerðin hefur í tvígang fjarlægt haldarana. mbl.is/Brynjólfur Löve

Sól skein í heiði og ylvolg hafgolan lék um blaðamenn Morgunblaðsins er þeir lögðu í hlaðinu í Varmahlíð undir Eyjafjöllum í vikunni. Hundarnir á bænum, Kani og Felix, tóku opnum loppum á móti okkur og í kjölfarið kom heimasætan, Ingveldur Anna Sigurðardóttir út á hlaðið og bauð okkur velkomin inn í Skúrinn, gistiheimilið sem fjölskyldan rekur. Þar hittum við fyrir móður hennar, Önnu Birnu Þráinsdóttur.

Skúrinn, eða The Garage, opnaði árið 2017, er hlýlegt gistiheimili og í móttökunni er ilmur af nýbakaðri skúffuköku. Hugmyndin að gistiheimilinu kviknaði nokkrum árum áður þegar Anna Birna hafði um nokkurra ára skeið horft á endalaust af erlendum ferðamönum keyra fram hjá bænum. Þegar kom að því að opna gistiheimilið tók það þó samhenta fjölskylduna á Varmahlíð aðeins 10 mánuði að moka út úr gamla fjósinu og gera það gistiheimili.

„Hér var haughúsið fullt af skít og gefið á fóðurganginn. Við hættum með kýr hér um árið 2000 og fórum að stunda daglaunavinnu. Við vorum orðin þreytt á að sinna daglaunavinnunni, níu til fimm. Við sáum hér ferðamenn keyra fram hjá niðri á þjóðvegi, endalaust. Þannig að við ákváðum að breyta um og tókum öll gömul hús sem við hugsanlega fundum á hlaðinu og breyttum í ferðamannagistingu. Það var mikið heillaspor,“ segir Anna Birna.

Mæðgurnar Anna Birna Þráinsdóttir og Ingveldur Anna Sigurðardóttir, ásamt hundunum Kana og Felix í hlaðinu heima í Varmahlíð. mbl.is/Brynjólfur Löve

Félagsleg tilraun sem vatt upp á sig

Anna Birna er fyrrverandi sýslumaður og Ingveldur Anna er með meistaragráðu í lögfræði frá Háskóla Íslands og vinnur sem fulltrúi sýslumanns á skrifstofu sýslumannsins á Hvolsvelli. Þá er hún einnig 2. varaþingmaður Sjálfstæðisflokksins í Suðurkjördæmi.

Næsti bær við Varmahlíð er Brekkukot, en þar má finna heimsfræga girðingu þar sem brjóstahaldarar hanga á henni. Uppátækið hófst þó allt við Varmahlíð á sér skemmtilega sögu.

„Við byrjuðum þetta,“ segir Ingveldur Anna en grípur þá móðir hennar inn í og dregur úr. „Þessi brjóstahaldaragirðing er ekki í okkar landi og ekki á okkar vegum. Við höfðum heyrt, þetta kom til tals á góðri stundu við eldhúsborðið, að það hafi verið ástralskur bóndi, hann og konan hans voru að vinna úti á akri. Konunni hans verður eitthvað heitt og fer úr að ofan og hengir brjóstahaldarann á girðinguna. Og gleymdi honum. Upp úr því komu fleiri og fleiri haldarar. Við hugsuðum að það væri gaman að prófa þetta, svona félagslega tilraun. Þeim fannst svo upplagt að gera þetta á girðingunni hjá okkur, bara niðri við heimreiðina. Sem þeir og gerðu einhverjir gárungar. Ég var ekki alveg með á því,“ segir Anna Birna sem þá var sýslumaður.

„Þetta þótti ekki embættinu til sóma,“ skýtur þá dóttir hennar inn í og Anna Birna tekur undir.

„Þannig ég tók helvítis brjóstahaldarana og flutti þá yfir til nágrannans sem eiginlega upptökin að þessu. Og síðan hafa þeir verið þar,“ segir Anna Birna.

Sömu brjóstahaldararnir hafa þó ekki fengið að hanga óáreittir þennan rúma áratug frá því uppátækið hófst og segir Anna Birna að Vegagerðin hafi hreinsað girðinguna minnst tvisvar sinnum. Segir hún Vegagerðina telja þá geta ógnað umferðaröryggi, því ítrekað stoppi vegfarendur til að virða þá fyrir sér og mynda.

Viðtalið má lesa í heild í Sunnudagsblaði Morgunblaðsins. Þá er þátturinn aðgengilegur á öllum helstu hlaðvarpsveitum.