Engu nær um hverjir brutu og brömluðu í klaustrinu

Tilkynnt var um skemmdarverk á gamla klaustrinu í Garðabæ um tíuleytið í gærkvöldi. Brotnar höfðu verið fjöldamargar rúður en engu stolið. 

Ekki er vitað hverjir voru að verki í gærkvöldi. mbl.is/Eyþór

Skúli Jónsson, stöðvarstjóri á lögreglustöðinni í Hafnarfirði, segir í samtali við mbl.is að ekki sé vitað hverjir voru þar að verki.

„Það var þarna tilkynnandi sem sagðist hafa séð til ungmenna vera þvælast þarna kvöldin á undan og þarna líka [gærkvöldi], en við erum ekki með nein nöfn eða neitt sko,“ segir Skúli.

Búið er að negla plötu fyrir þá glugga sem brotnir voru. mbl.is/Eyþór

Hann segist ekki kannast við skemmdarverk af þessu tagi í Hafnarfirði eða Garðabæ og kannast ekki heldur við grunsamlegar hópamyndanir ungmenna. 

Húsnæðið í eigu Garðabæjar

Klaustrið var áður í eigu Sankti Jósefssystra en var keypt af Garðabæ árið 2014. Í kaupsamningi sem gildir til ársins 2028 var kvöð um að nota húsnæðið fyrir aldraða eða aðra mannúðarstarfsemi.

Húsnæðið hefur lítið verið notað og þurfti töluverðar endurbætur og viðhald samkvæmt ástandsmati.

Í vor óskaði Garðabær eftir upplýsingum frá hæfum aðilum með áhuga á að kaupa eða leigja, endurbæta, viðhalda og reka klaustrið sem stendur við Holtsbúð 87. 

Frétt af mbl.is

Gengur klaustrið í endurnýjun lífdaga?

• Blogga um frétt