Minna fólk á skoðunartíma í gegnum Ísland.is

Samgöngustofa mun nú minna bifreiðaeigendur á skoðunartíma ökutækja sinna í gegnum Ísland.is.

Verður það gert í gegnum stafrænt pósthólf á Ísland.is sem Samgöngustofa hefur nú tengst, en með því gefst kostur á aukinni skilvirkni og betri þjónustu við viðskiptavini. Þetta kemur fram í tilkynningu frá Samgöngustofu.

Ábyrgðin áfram hjá eiganda ökutækisins

Eins og fram kemur hér að ofan hefur Samgöngustofa tengst stafrænu pósthólfi Ísland.is. Í fyrsta áfanga verður pósthólfið nýtt til að minna fólk á skoðunartíma ökutækja sinna, að því er fram kemur í tilkynningunni.

Felur það í sér að fyrsta dag skoðunarmánaðar ökutækisins fær eigandi ökutækisins póst í gegnum Ísland.is um að komið sé að skoðun. Einnig fær fólk póst um tveimur vikum áður en vanrækslugjald fellur á. Ábyrgð á því að færa ökutæki til skoðunar liggur áfram hjá eiganda eða umráðamanni þess.

„Allir einstaklingar sem fá útgefna kennitölu og allir lögaðilar sem skráðir eru í fyrirtækjaskrá hafa aðgang að sínu eigin stafræna pósthólfi á Ísland.is. Hægt er að stilla pósthólfið þannig að það sendi hnipp til eiganda þess þegar póstur hefur borist,“ segir í tilkynningunni. 

• Blogga um frétt