Vinnumálastofnun bárust tvær tilkynningar um hópuppsagnir í júní. Uppsagnirnar ná til 96 starfsmanna í farþegaflutningum og fiskvinnslu.
Uppsagnirnar koma flestar til framkvæmda á tímabilinu ágúst til október á þessu ári.
Þetta kemur fram í tilkynningu frá Vinnumálastofnun.
Í byrjun júnímánaðar var greint frá uppsögn 56 starfsmanna sjávarútvegsfyrirtækisins Þorbjarnar hf. í Grindavík.
Krefjandi aðstæður vegna jarðhræringa voru sagðar hafa leitt til breytinga á starfsemi fyrirtækisins.
Um miðjan júní bárust svo fréttir um að Icelandair hefði sagt upp 57 flugmönnum til að aðlaga mönnun að flugáætlun félagsins í vetur.
Kom þá fram að flugmennirnir myndu láta af störfum 1. október en að flugfélagið gerði ráð fyrir að geta boðið þeim starf aftur næsta vor.