Eðlilegt að framkvæmdir kosti meira í dag

„Þetta er vissulega eins og öll önnur verkefni á Íslandi í dag umtalsvert dýrara heldur en þegar menn lögðu af stað. Samgönguvísitala hefur hækkað held ég um 30% á stuttum tíma þannig það er alveg eðlilegt að það hafi kostað meira. En framkvæmdirnar ganga vel og þetta er stórkostleg framkvæmd,” segir Sigurður Ingi Jóhannsson, fjármála- og efnahagsráðherra, um framkvæmdir við Hornafjarðarfljót.  

Greint hefur verið frá því að kostnaður Vega­gerðar­inn­ar vegna fram­kvæmdanna við Horna­fjarðarfljót hafi farið fram úr gild­andi fjár­heim­ild­um Alþing­is svo millj­örðum skipt­ir. 

Hornafjarðarfljót langt fram úr áætlun

Fram­kvæmd­in við Horn­a­fjarðarfljót átti fyrst að kosta 4,9 millj­arða króna og átti kostnaðinum að vera skipt jafnt á milli rík­is og einkaaðila. Þrátt fyrir misheppnuð útboð var ákveðið að fara af stað með verkefnið, án nægjanlegra fjárheimilda og aðkomu einkaaðila, og er nú kostnaður kominn upp í 8,9 milljarða.  

Frétt af mbl.is

Framkvæmdir fram úr heimildum

Greint var frá því á dögunum að önnur stór verkútboð sem stóðu til á árinu hefðu verið sett á ís vegna framkvæmdanna við Hornafjarðarfljót. Var talið að framkvæmdirnar væru að soga til sín fjármagn sem átti að nýta í önnur verkútboð. Sagði þá í tilkynningu frá stjórn Vestfjarðastofu að verið væri að svíkja gefin loforð og að óboðlegt væri að ekki yrði farið í verkútboð á vegaframkvæmdum í Gufudalssveit og á Dynjandisheiði á þessu ári.  

Frétt af mbl.is

Verið að svíkja gefin loforð

„Þau eru öll í gangi þau verkefni sem voru farin af stað,” segir Sigurður Ingi er hann er spurður hvort framkvæmdirnar við Hornafjarðarfljót séu í forgangi fram yfir aðrar vegaframkvæmdir.  

Stefna á útboð í ár

Verður farið í framkvæmdir í Gufudalssveit og á Dynjandisheiði? 

„Já það eru til dæmis verkefni sem stendur til að bjóða út og verða vonandi boðin út á árinu þó að það seinki eitthvað á útboðinu. Það er auðvitað það sem við þurfum að gera í samfélagi þar sem er þensla að þá þurfum við að draga aðeins úr væntingunum og það á ekki endilega að koma niður á framkvæmdahraðanum þ.e.a.s. hvenær framkvæmdin er búin,” segir Sigurður Ingi og bætir við: 

„En það þarf hins vegar að fara vel yfir það hvernig við getum haldið áfram fjárfestingu í landinu – þessari mikilvægu fjárfestingu – ekki síst í samgöngumálum í svona aðþrengdu efnahagsástandi.” 

• Blogga um frétt