Fylgi Miðflokksins komi frá Sjálfstæðisflokknum
Setja bókamerki
Miðflokkurinn hefur aldrei í sögu flokksins mælst með meira fylgi í Þjóðarpúlsi Gallup en nú og líkur er á að fylgi þeirra komi fyrst og fremst frá Sjálfstæðisflokknum.
Þetta segir stjórnmálafræðingurinn Eva Heiða Önnudóttir í samtali við mbl.is.
„Það hefur alltaf verið töluverð færsla á fylgi á milli Sjálfstæðisflokks og Miðflokks og Sjálfstæðisflokkurinn hefur náttúrulega verið að fá lægra í könnunum núna en hann fékk í kosningunum. Það er ekkert ólíklegt að töluvert af því fylgi sé að fara á Miðflokkinn,“ segir hún aðspurð um fylgi Miðflokksins.
Mögulega óánægjufylgi
Hún segir að möguleg útskýring á fylgisaukningu flokksins sé að kjósendur Sjálfstæðisflokksins og Framsóknarflokks, sem eru óánægðir með ríkisstjórnarsamstarfið, hafi yfirgefið flokkanna og svari í könnunum að þeir hyggist kjósa Miðflokkinn.
Viðreisn gæti reyndar líka grætt á þeim kjósendum, segir hún.
Miðflokkurinn mælist með 14,5% fylgi í könnun Gallup í gærkvöldi. Flokkurinn náði síðast hápunkti þann 29. febrúar árið 2020 þegar hann mældist með 14,2% fylgi.
Tekur miklu meira frá Sjálfstæðisflokknum
Miðflokkurinn var upphaflega klofningsframboð Framsóknar og mælist nú með rúmlega tvöfalt meira fylgi en Framsókn, sem mælist með 6,6% fylgi.
Er það óvenjulegt?
„Nei, ég myndi ekki segja það. Meðal annars vegna þess að allar kannanir sem hafa verið gerðar, þar sem er spurt hvaða flokk fólk kaus síðast, þá sjáum við að Miðflokkurinn er í raun að taka miklu meira frá Sjálfstæðisflokknum en Framsóknarflokknum,“ segir hún.
Eva bendir á að þannig hafi það verið allt frá stofnun Miðflokksins.
„Sem var kannski ekki það sem fólk bjóst við þar sem hann klífur sig frá Framsóknarflokknum.“
Óljóst hvert fylgi Framsóknar er að fara
Erfitt er að segja nákvæmlega um hvert fylgi Framsóknar er að fara, að sögn Evu. Hún bendir á að Framsóknarflokkurinn sé miðjuflokkur og því gæti fylgistapið verið að dreifast í allar áttir.
Nefnir hún sem dæmi að fylgið gæti verið að fara yfir til Miðflokksins, Samfylkingarinnar, Viðreisnar og Flokks fólksins.
Lítið forspárgildi um úrslit kosninga
Vinstri græn mælast annan mánuðinn í röð hjá Gallup með undir 5% fylgi og næðu því ekki manni á þing.
„Ég held að það hafi ekki gerst í könnunum frá því hann var stofnaður sem VG, að hann hafi farið undir þennan 5% þröskuld í skoðanakönnunum,“ segir Eva en bætir við:
„En skoðanakannanir sem eru gerðar á miðju kjörtímabili gefa lítið forspárgildi um úrslit kosninganna. Um leið og kosningabaráttan fer að byrja fer maður að sjá kannanir sem gefa kannski einhverja forspá um hver geta verið úrslit kosninganna.“
Fylgi Pírata stendur í stað
Píratar mælast með 8,8% fylgi og standa nokkurn veginn í stað. Evu þótti þetta áhugavert í ljósi þess að fylgi annarra flokka er á meiri hreyfingu.
„Kannski er þetta endurspeglun á það að Píratar hafa ekki verið að standa í mjög umdeildum málum undanfarið, eins og til dæmis Samfylkingin. Það var töluverð óánægja með að þau mótmæltu ekki útlendingafrumvarpinu kröftulega,“ segir hún.
Segir ekkert til í því að bindingarefnið sé verra
Eðlilegt að framkvæmdir kosti meira í dag
Lokahnykkur á brotnum hafís í 36 tíma
Samfylkingin niður í 27% og VG út af þingi
Fresta dómsuppkvaðningu í máli Trumps
Fylgi Miðflokksins komi frá Sjálfstæðisflokknum