Myndir: Björguðu fótbrotnum göngumanni

Hálendisvakt Slysavarnafélagsins Landsbjargar í Landmannalaugum barst fyrr í dag útkall vegna göngumanns sem hafði dottið á Bláhnjúki skammt sunnan Landmannalauga. Göngumaðurinn fótbrotnaði. 

mbl.is greindi frá málinu fyrr í kvöld. 

Frétt af mbl.is

Þyrla LHG kom slösuðum göngugarpi til bjargar

Færa þurfti hinn slasaða úr mesta brattlendinu. Ljósmynd/Landsbjörg

Í tilkynningu frá Landsbjörg kemur fram að þegar hópurinn hafi komið að vettvangi hafi verið ljóst að erfitt yrði að bera viðkomandi frá slysstað vegna aðstæðna. Flutningur hefði reynt óþarflega mikið á sjúklinginn.

„Búið var um hinn slasaða á börum en í hóp Hálendisvaktar eru 2 sjúkraflutningamenn og í gönguhópnum var einnig læknir. Óskað var eftir því við Neyðarlínuna að þyrla yrði boðuð á staðinn til að flytja hinn slasaða af vettvangi,“ segir í tilkynningunni. 

Göngumaðurinn fótbrotnaði. Ljósmynd/Landsbjörg

Fluttu hann úr mesta brattlendinu

Á meðan þyrla Landhelgisgæslunnar var á leiðinni þurfti að flytja hinn slasaða í börum úr mesta brattlendinu niður á stað sem þyrlan gæti lent á.

„Björgunarfólk setti upp tryggingar og flutti sjúklinginn niður á áreyrar þarna nærri þar sem þyrlan svo lenti, sjúklingur borinn um borð og fluttur til aðhlynningar,“ segir í tilkynningunni. 

• Blogga um frétt