Nú rétt í þessu barst vegagerðinni tilkynning um hjólreiðamann í Hvalfjarðargöngunum. Lögreglan er komin til móts við hann í göngunum og fylgir honum út. Göngunum hefur ekki verið lokað og verður það að öllum líkindum ekki.
Hjólreiðamaðurinn er lítt sjáanlegur, svartklæddur á svörtu hjóli með svarta tösku.
Þjónustufulltrúi hjá Vegagerðinni, Sveinbjörn Hjálmarsson, segir að engin sekt sé fyrir að hjóla í gegnum göngin og þar með stífla umferð, skapa slysahættu og vera valdur þess að göngunum sé lokað í sumum tilfellum.
„Viðurlögin eru eiginlega skömmin. Því þú hefur Tesluna [lögreglubílinn] á blikkandi bláu keyrandi á eftir þér á meðan þú hjólar upp úr göngunum.
Það er óhætt að segja það að hjólreiðarmanninum líður ekkert sérstaklega vel þegar hann er kominn upp úr göngunum eftir að hafa haft lögreglubílinn fyrir aftan sig,“ sagði kollegi Sveinbjörns hjá Vegagerðinni, Svanur Þorvaldsson, í samtali við mbl.is í seinustu viku.