Fjögur málverk hafa bæst í safn verka eftir listamanninn Kjarval á Listasafni Reykjavíkur. Fjórir bræður afhentu safninu verkin að gjöf en afi þeirra hafði komið upp merku málverkasafni á sínum tíma.
Fram kemur í tilkynningu frá Listasafni Reykjavíkur að bræðurnir Jón, Halldór, Árni og Einar Rúnar Guðmundssynir og fjölskyldur þeirra hafi afhent safninu veglegu listaverkagjöfina í júní.
Greint er frá því að afi bræðranna, Jón Þorsteinsson, hafi verið íþróttakennari og listaverkasafnari. Hann hafi komið upp merku málverkasafni sem var að stórum hluta byggt á verkum Kjarval.
Jón Þorsteinsson og kona hans, Eyrún Guðmundsdóttir, hafa fært Listasafni Reykjavíkur fjölmörg listaverk eftir Kjarval sem teljast lykilverk í Kjarvalssafni. Eitt af þeim verkum er Bónorðið, sem prýddi forsíðu bókar Thors Vilhjálmssonar um ævistarf Jóhannesar Kjarval.
„Listasafn Reykjavíkur þakkar fjölskyldunni af heilum hug höfðinglega gjöf og mun leitast við að sýna og rannsaka þau í samhengi listasögunnar um ókomna tíð,“ stendur í tilkynningu listasafnsins.