Ómar R. Valdimarsson, lögmaður dóttur manns sem fórst í bifhjólaslysi á Kjalarnesi ásamt eiginkonu sinni fyrir fjórum árum, segir að niðurfelling héraðssaksóknara á máli í tengslum við banaslysið verði kærð til ríkissaksóknara, enda sé algjörlega óásættanlegt að enginn þurfi að sæta ábyrgð vegna þess sem gerðist.

Slysið varð á ný­lögðu og hálu mal­biki sem stóðst ekki kröf­ur Vega­gerðar­inn­ar. Við rann­sókn máls­ins fengu starfsmaður verk­kaupa, verk­stjóri slit­lagn­ing­ar, eft­ir­litsmaður og deild­ar­stjóri fram­leiðslu­deild­ar hjá fram­leiðanda mal­biks­ins rétt­ar­stöðu sak­born­ings. 

Ekki var talið að þau gögn sem komu fram hafi verið nægi­leg eða lík­leg til sak­fell­is. Því var málið fellt niður.

Frétt af mbl.is

Fellir niður mál vegna banaslyss á Kjalarnesi

Kallar eftir ábyrgð 

„Það er full ástæða til að skjóta málinu þangað [til ríkissaksóknara] og láta það embætti fara yfir ákvörðun héraðssaksóknara. Hvort það sé virkilega svo að fólk þurfi ekki að bera ábyrgð á því að hafa ekki valdið störfum sínum með þeim hætti að það látist tveir einstaklingar sem hefðu alls ekki þurft að deyja hefði rétt verið staðið að málunum,“ segir Ómar.

Ómar R. Valdimarsson. Ljósmynd/Aðsend

Einnig segir hann það dapurlegt að skjólstæðingur hans hafi eftir langa bið eftir niðurstöðu frétt af niðurfellingu málsins í gegnum tilkynningu á Island.is.

Ónærgætni hafi þarna gætt í kerfinu og eðlilegra hefði til dæmis verið að láta lögmann hennar vita, sem hefði getað komið boðunum áleiðis.

Tengdar fréttir

Banaslys á Kjalarnesi

Fellir niður mál vegna banaslyss á Kjalarnesi

• Bar að stöðva umferð vegna ófullnægjandi malbiks
• Vegagerðin eykur kröfur á verktaka
• Missti sjálfur foreldra sína í bílslysi
• Starfsmenn eru harmi slegnir

» Fleiri tengdar fréttir

• Blogga um frétt