„Þetta lá fyrir allan tímann“

Þórarinn Ingi Pétursson, formaður atvinnuveganefndar Alþingis og þingmaður Framsóknarflokksins, á 0,8% hlut í Búsæld ehf., sem á rúmlega 43% hlutafjár í Kjarnafæði Norðlenska hf.

Eins og mbl.is greindi frá í gær hafa hlut­haf­ar í Kjarna­fæði Norðlenska hf. samþykkt til­boð Kaup­fé­lags Skag­f­irðinga um kaup á allt að 100% hluta­fjár í Kjarna­fæði Norðlenska hf.

Þórarinn segist ekki hafa íhugað að lýsa yfir vanhæfi er atvinnuveganefnd lagði til umdeildar breytingar á búvörulögum, sem gera umrædd kaup möguleg.

Frétt af mbl.is

Kaupfélag Skagfirðinga kaupir Kjarnafæði Norðlenska hf.

Kom ekki til greina að lýsa sig vanhæfan

Meirihluti atvinnuveganefndar lagði fram þessar breytingar á síðasta þingi, en þær fela í sér und­anþágu afurðastöðva í kjötiðnaði frá sam­keppn­is­lög­um sem gerir þeim auðveld­ara fyr­ir að sam­ein­ast. Lögin voru samþykkt í mars.

Frétt af mbl.is

Ný búvörulög samþykkt

Spurður hvort hann hafi íhugað að lýsa sig vanhæfan í málinu segir Þórarinn það ekki hafa komið til greina. Það hafi legið fyrir síðan hann tók sæti á Alþingi að hann og kona hans ættu 0,8% hlut í Búsæld ehf. Hann segir það hafa verið skráð í hagsmunaskrá hans á vef Alþingis.

„Nei, það kom aldrei til. Þetta lá fyrir allan tímann, að við hjónin ættum þennan eignarhlut í þessu eignarhlutafélagi sem á í Kjarnafélagi Norðlenska,“ segir Þórarinn í samtali við mbl.is.

Hlut­haf­ar Bú­sæld­ar ehf. munu ákveða hver fyr­ir sig hvort þeir selji sína hluti. Þórarinn segir þau hjónin eiga eftir að taka ákvörðun um hvort þau selji sinn hlut.

• Blogga um frétt