Veðrið stoppar ekki hátíðarhöld

Flughátíðin á Hellu hefst í dag af fullu fjöri, en fyrstu gestir mættu á svæðið á mánudag, eflaust til að ná bestu stæðum tjaldsvæðisins.

Matthías Sveinbjörnsson, forseti Flugmálafélags Íslands og skipuleggjandi hátíðarinnar, segir allt stefna í bráðskemmtilega helgi, þrátt fyrir örlítið dapurlega veðurspá. 

„Hátíðin verður á sínum stað“ 

„Veðrið hefur ekkert verið að leika við okkur, við getum orðað það þannig, og í sjálfu sér ekkert útlit fyrir að það breytist. Það hefur verið gráskýjað með smá skúrum, en það stoppar okkur ekki, hátíðin verður á sínum stað. “

Þá segir hann að fólk streymi inn á svæðið á húsbílum, á tjaldsvæðin eða í aðra gistingu á svæðinu. 

„Ætli þetta sé ekki á annan tug manns sem eru komnir hingað, og verða eflaust mikið fleiri er líður á helgina, en það er smá erfitt að lesa í það hvort fólk ætli að elta sólina eitthvað annað eða hvort það komi hingað.“

Flugsýningar og fallhlífarstökk

Matthías segir að hápunktur hátíðarinnar sé morgundagurinn, enda verði þá samfelld flugsýning frá kl. 12-18, þar sem flugvélar af öllum gerðum taka á loft, lenda og sýna listir sínar yfir svæðinu. 

Einnig verður á boðstólnum að skella sér í fallhlífarstökk og í svifflug, ef veður leyfir, en dagurinn endar svo á sameiginlegri grillveislu og kvöldvöku í flugskýlinu á flugvellinum. 

Hægt er að skella sér fallhlífarstökk á Flughátíðinni um helgina, ef veður leyfir. mbl.is/Óttar Geirsson

Veðrið hefur nú þegar sett sitt mark á hátíðina, en erfitt hefur verið að fljúga vélum frá höfuðborgasvæðinu á Hellu síðustu daga. 

„Ætli við þurfum ekki að borga aðeins fyrir þetta góða veður sem var á hátíðinni í fyrra,“ segir Matthías kíminn. 

Karamellukastið verður á sínum stað á morgun, til mikillar gleði yngri kynslóðanna, en þá er karamellum kastað úr flugvélum á flugi og börnin, og jafnvel fullorðnir, reyna að grípa einhverjar þeirra í lófann. 

• Blogga um frétt