Uppköst, niðurgangur og ört hækkandi blóðþrýstingur

Matvælastofnun mun áfram fylgjast með þróun mála í tengslum við bann Dana á þremur tegundum af Buldak-núðlunum vinsælu.

Þetta segir í skriflegu svari Katrínar Guðjónsdóttur, deildarstjóra matvæladeildar MAST, við fyrirspurn mbl.is.

Danir ákváðu nýlega að innkalla og banna núðlurnar vegna hættulegs magns kap­saísíns, sem má finna í eldpipar.

Segir Katrín stofnuninni ekki hafa borist ábendingar um núðlurnar frá neytendum en muni bregðast við ef aðstæður kalli á. Hún ráðgeri að svo stöddu að setja fram upplýsingar/viðvörun til neytenda almennt um neyslu á mjög sterkum eldpipar.

Frétt af mbl.is

Banna vinsæla tegund af Buldak-núðlum

Danir ákváðu nýlega að innkalla og banna núðlurnar vegna hættulegs magns kap­saísíns. Ljósmynd/Samyang

Almenn regla gegn heilsuspillandi matvælum

Bendir Katrín á að ákvörðun danska matvælaeftirlitsins sé byggð á þeirra eigin áhættumati en að í Evrópu séu engi hámarksgildi fyrir magn efnisins í gildi. Svo virðist sem Danir séu að ríða á vaðið með að banna vöruna þar sem aðrar þjóðir hafi enn ekki gengið svo langt.

„Það mætti sjá fyrir sér að í framtíðinni verði sett einhver hámarksgildi fyrir þessi efni í matvælum vegna þess að sannarlega geta þau verið skaðleg í miklu magni,“ segir Katrín.

„Það fyrirfinnst hins vegar sú almenna regla að ekki megi hafa á boðstólnum matvæli sem geta valdið heilsuskaða, og á því byggir ákvörðun danskra matvælayfirvalda, að fengnu áhættumati frá vísindamönnum hjá áhættumatsstofnun þeirra á sviði matvælaöryggis,“ segir í svari Katrínar. 

Hættan kemur sérstaklega fram við áskoranir

Helstu skaðlegu áhrif of mikillar neyslu á kapsaísín-efninu séu áhrif á slímhúð, meltingarfæri, uppköst, niðurgangur, verkir og getur blóðþrýstingur einnig hækkað snögglega, sem getur verið afar skaðlegt.

„Því má bæta við að hættan við neysluna kemur sérstaklega fram þegar farið er í „áskoranir“ um að borða vörur sem eru svo sterkar að fólk þarf að hundsa skilaboð líkamans um brunatilfinningu til að halda neyslunni áfram,“ segir Katrín.

Fólk sé misviðkvæmt fyrir áhrifum og sumir virðist þola mikið meira en aðrir án skaðlegra áhrifa. Börn geti aftur á móti verið mjög viðkvæm fyrir skaðlegum áhrifum.

Frétt af mbl.is

Ekki fengið ábendingar um sterku núðlurnar

• Blogga um frétt