Íslenskur karlmaður á sextugsaldri fannst látinn á hóteli í Samut Prakan-umdæmi í Taílandi í morgun.
Engir sjáanlegir áverkar voru á líkinu.
Starfsfólk hótelsins segir að maðurinn hafi dvalið á hótelinu í tæpan mánuð, samkvæmt umfjöllun taílenska miðilsins Thaiger en DV greindi fyrst íslenskra miðla frá.
Samut Prakan er á höfuðborgarsvæði Taílands, suður af höfuðborginni Bangkok.
Taílenski miðillinn hefur eftir rannsóknarlögreglumanninum Damrong Sukchusri að tilkynning hafi borist kl. 11.30 í dag um andlát erlends manns af óþekktum ástæðum á hóteli í Bang Phli-hverfinu í Samut Prakan.
Inni á hótelherbergi á annarri hæð fundu lögregluþjónar 54 ára íslenskan mann sem lá látinn við hlið rúmsins, klæddur svörtum bol og rauðum stuttbuxum.
Hann hafði verið látinn í að minnsta kosti 6 til 12 klukkustundir, að sögn lögreglu.
Við skoðun á líkinu sáust engin merki um að hann hefði látist vegna líkamsárásar eða annarra líkamlegra átaka. Í herberginu fundust aftur á móti nokkrar áfengisflöskur og bjórdósir, sem voru skráðar sem sönnunargögn.
Líkið var sent á Ramathibodi Chakri Naruebodindra-sjúkrahúsið til krufningar.
Starfsmaður hótelsins sem kom að manninum látnum segir að hinn látni hefði leigt herbergið daglega og að jafnaði komið um kl. 10.30 á hverjum morgni til að skrá sig út af herberginu, samkvæmt umfjöllun Thaiger.
Maðurinn hafi dvalið einn á herberginu í tæpan mánuð. Starfsmaðurinn varð áhyggjufullur þegar maðurinn kom ekki niður á hefðbundnum tíma og kíkti því inn í herbergið þar sem hann kom að manninum látnum.
Lögreglu sem kom á vettvang grunar að maðurinn hafi drukkið óhóflegt magn af áfengi sem leiddi til andlátsins eða að undirliggjandi heilsufarsástand hafi valdið andlátinu.
Beðið er eftir niðurstöðum krufningar, að sögn lögreglu.