Fram að helgi mun lægðasvæði suður af landi stýra veðrinu, að því er segir í hugleiðingum veðurfræðings Veðurstofu Íslands.
„Austlægar áttir verða því ríkjandi og þeim fylgja lægðadrög og úrkomubakkar,“ segir þar einnig.
Búast megi við vætu víða á landinu, en síst á Norðurlandi. Nokkuð milt loft streymi yfir landið en hiti nái varla yfir 20 stig. Það yrði þó helst á Norðvesturlandi eða Vestfjörðum.
Um helgina megi reikna með norðlægari vindi, „en þá rofar víða til á sunnanverðu landinu, en rignir og kólnar fyrir norðan“.