Fernuvörur frá Örnu ófáanlegar vegna bilunar

Bilun í fernupökkunarvél hjá mjólkurvinnslunni Örnu hefur gert það að verkum að engar vörur í fernum hafa borist í verslanir frá fyrirtækinu um nokkurt skeið. Framkvæmdastjóri Örnu segist vona að vörurnar komi aftur í búðir í byrjun næstu viku. 

„Það bilaði hjá okkur fernupökkunarvél sem pakkar í fernur, mjólk, AB-mjólk og jógúrt og annað, við höfum ekki getað greitt það út,“ segir Hálfdán Óskarsson framkvæmdastjóri Örnu í samtali við mbl.is. 

Bilun kom upp í fernupökkunarvél Örnu á mánudaginn í síðustu viku og þurfti að kalla til viðgerðarmenn að utan. Það hefur reynst erfitt vegna sumarleyfa en mennirnir eru væntanlegir til landsins á morgun.

„Á þriðjudaginn í næstu viku ættu vörur að fara að berast aftur í búðir,“ segir Hálfdán. Viðgerðarmenn muni vinna í vélinni næstu daga. 

Missa út sölu í tvær vikur

Spurður hvort þetta hafi mikil áhrif á fyrirtækið segir hann erfiðast að geta ekki skaffað vörur til viðskiptavina. Erfitt sé að missa út sölu í tvær vikur. 

„Svona er þetta bara stundum, þegar tæki bilar er ekkert við því að gera svo sem,“ segir Hálfdán. 

„Við missum út sölu, eins og núna, í tvær vikur, á fernuvörum. Við erum náttúrulega að pakka í dósir og dósavörur, gríska jógúrt, skyr og annað þessháttar en auðvitað hefur þetta áhrif. Þetta er mjög slæmt þegar þetta gerist en svona er þetta bara,“ segir Hálfdán. 

• Blogga um frétt