Skipulags- og umferðarnefnd Seltjarnarnesbæjar hefur hafið undirbúning að endurskoðun á umferðaröryggisáætlun. Nefndin skoðar hvað hægt sé að gera til að ná niður hraðakstri og stöðva framúrakstur á Norðurströnd.
Þetta segir Svana Helen Björnsdóttir, formaður nefndarinnar, í samtali við mbl.is.
Þór Sigurgeirsson, bæjarstjóri Seltjarnarnesbæjar, hefur lýst áhyggjum sínum af hraðakstri á Norðurströnd í mörg ár. Þá hafa íbúar bæjarins einnig lýst áhyggjum af hraðakstri á veginum í facebookhópi ætluðum íbúum bæjarfélagsins.
„Í þeirri umferðaröryggisáætlun sem er enn í gildi kom fram að það þyrfti að lækka hraða á Norðurströnd og hann var lækkaður úr 60 km í 50 km. Það virðist ekki duga til,“ segir Svana.
Hún segir hraðaksturinn og framúraksturinn sérstaklega eiga sér stað á kvöldin og um helgar og að íbúar verði varir við þetta.
„Við höfum verið að tala um að setja upp umferðareyjur á þremur stöðum þar sem keyrt er inn á Norðurströndina og jafnvel að búa til einhverja hlykki til að draga úr hraða og stöðva framúraksturinn,“ segir Svana.
Hún bætir við að nefndin ætli að fá verð í tilbúnar eyjur sem hægt er að skrúfa niður í götuna, en annars verði að láta steypa þær.
„Við höfum líka verið að skoða það að búa til sveigjur, svipaðar og eru á Ægisíðu. Þá er ekki hægt að keyra svona hratt, ökumenn verða að hægja á sér,“ bendir Svana á.
„Við ætlum að láta sérfræðinga í umferðaröryggismálum ráðleggja okkur í þessu, en við erum að undirbúa þetta og það verður eitthvað gert af þessu tagi. Útfærslan er bara í skoðun,“ segir hún að lokum.