Íslendingurinn sem fannst látinn á hótelherbergi í Taílandi í gærmorgun hafði ekki yfirgefið herbergið í tæpan sólarhring áður en hótelstarfsfólk kom að honum látnum, ef marka má myndefni úr öryggismyndavélum.
Líklegt þykir að hann hafi látist vegna mikillar áfegnisneyslu eða undirliggjandi veikinda.
Í gær komu hótelstarfsmenn að 54 ára íslenskum manni látnum á hótelherbergi í Bang Phli-hverfi í sveitarfélaginu Samut Prakan í Taílandi. Samut Prakan er á höfuðborgarsvæði Taílands, suður af höfuðborginni Bangkok.
Taílenski fréttamiðillinn AmarinTV greinir frá. Maðurinn er sagður hafa dvalið á hótelinu í tæpan mánuð. Sjónvarpsstöðin Ch7HD fjallar einnig um málið.
Lögregla telur líklegt að hann hafi látist vegna mikillar neyslu á áfengi eða að undirliggjandi sjúkdómar hafi spilað inn í dánarorsökina. Hótelstarfsmenn sögðu að Íslendingurinn drykki nær daglega.
Nýjustu vendingar í rannsókninni varða myndefni úr öryggismyndavélum en út frá því má rekja tímalínu atburða fram að andlátinu.
Enn þarf þó að bíða eftir niðurstöðu krufningar til að segja til um dánarorsök en engir sjáanlegir áverkar voru á líkinu, að minnsta kosti ekkert sem gaf átök til kynna.
Réttarlæknar segja að maðurinn hafi verið látinn í um 6-12 tíma. Búið er að hafa samband við sendiráð Íslands vegna andlátsins, samkvæmt frétt Amarin, en sendiráð Íslands í Peking í Kína sér um erindi er varða Taíland.