Vigdís Finnbogadóttir, fyrrverandi forseti Íslands, fékk á dögunum könguló nefnda í höfuðið á sér. Tilefnið er ný rannsókn Inga Agnarssonar, prófessors í dýrafræði við Háskóla Íslands, þar sem hann og samstarfsmenn hans uppgötvuðu nýja tegund af könguló í Madagaskar. 

Köngulóin heitir Vigdisia og vísar þar í nafn Vigdísar Finnbogadóttur. 

Spurður hvernig nafngiftin kom til segir Ingi að honum hafi lengi langað til að heiðra Vigdísi með nafngift í höfuðið á henni og sá þetta sem gullið tækifæri.

Ingi segir þær vera með marga svipaða eiginleika. Til að mynda sé köngulóin einstaklega falleg og glæsileg, líkt og Vigdís. Þá er hún mynstruð á litinn, með langar lappir og beitir kænsku í veiðum sínum. 

„Hún er bara mjög klár og flott könguló, alveg eins og Vigdís,“ segir hann og hlær. 

Hefur nefnt í höfuðið á Nelson Mandela og Obama

Samstarfsmenn Inga eru ekki Íslendingar og spurður hvort allir hafi verið á sama máli að skýra þessa nýju tegund í höfuðið á Vigdísi, segir hann að þeir hafi vitað af henni, enda þekktur leiðtogi um allan heim, og að þeim hafi fundist þetta einstakleg skemmtilegt tækifæri. 

Spurður hvort það séu margar dýrategundir sem hafa verið nefndar í höfuðið á þjóðarleiðtogum segir Ingi að hann hafi nefnt köngulær í höfuðið á Barack Obama, fyrrum Bandaríkjaforseta, og Nelson Mandela, fyrrverandi forseta í Suður-Afríku. 

Hér að neðan má sjá mynd af köngulónni sem dóttir Inga teiknaði upp. 

Hér má sjá köngulóna Vigdisia. Ljósmynd/Aðsend

Tengdar fréttir

Krúttleg dýr

Kattaathvörf landsins að fyllast

• Körturnar geta verið eitraðar hundum og köttum
• Sat fastur á þaki eftir að hafa flúið af svölunum
• Vill banna hvolpajóga
• Leita nafna á goslömbin

» Fleiri tengdar fréttir

• Blogga um frétt