Skriða féll yfir Reykjastrandarveg

Skriða féll fram á Reykjastrandarveg  í Skagafirði fyrr í dag og líklegt þykir að fleiri skriður falli á næstu dögum vegna mikillar úrkomu á Norðurlandi.

„Við fengum bara tilkynningu frá Vegagerðinni að það væri aurskriða á veginum, vegi 748 [Reykjastrandarvegi],“ segir Martina Stefani, sérfræðingur við ofanflóðahættumat hjá Veðurstofu Íslands. Liggur vegurinn norður Reykjaströnd frá Sauðárkróki.

„Þau komu að því í morgun, þau eru búin að hreinsa og vegurinn er aftur opinn,“ bætir Martina við í samtali við mbl.is

Lægð er yfir Norðurlandi og snjóað hafði til fjalla í Eyjaf­irði í morg­un. Bæði Hlíðarfjall og Súl­ur voru snævi þakin.

Frétt af mbl.is

Snjóaði til fjalla norðanlands í nótt

Skriður falla þegar styttir upp

Martina bendir á að skriður falli oft um leið og hættir að rigna. Spáð hafði verið talsverðri rigningu á norðanverðu á Tröllaskaga í dag og gær – og hefur spáin gengið eftir að sögn Martinu.

„Það var mikil rigning á veginum, við erum ekki með neinn úrkomumæli akkúrat á þessu svæði en þetta var bara sama lægð og fór yfir og er enn yfir öllum Tröllaskaga.“

Samfara úrkomunni hefur verið hvöss vestanátt og hiti á bilinu 6-10 stig. Við slíkar aðstæður má búast við vatnavöxtum í ám og lækjum en samfara því eykst hætta á skriðum og grjóthruni í bröttum hlíðum.

Sérfræðingurinn ráðleggur því landsmönnum að sýna aðgát næstu daga á þekktum skriðusvæðum.

„Ég myndi mæla með því að vera vakandi fyrir þessu næstu tvo daga. Og forðast brattar hlíðar og bara... horfa upp,“ segir Martina og hlær örlítið við.

• Blogga um frétt