Tveir jarðskjálftar mældust norðvestur af Torfajökli í dag, á vesturmörkum Torfajökulsöskjunnar.
Fyrsti skjálftinn mældist 1,5 að stærð og fljótlega á eftir varð annar stærri skjálfti sem mældist 2,9 að stærð.
Þetta segir Ingibjörg Andrea Bergþórsdóttir, náttúruvársérfræðingur hjá Veðurstofu Íslands, í samtali við mbl.is.
Hún segir að um tvo sjálfstæða skjálfta hafi verið að ræða og að ekkert óeðlilegt sé við það að skjálftar mælist á þessu svæði.
Svæðið lýtur heildarvöktun Veðurstofunnar og verður áfram fylgst með stöðu mála.
Rúmt ár er liðið síðan greint var frá því að landris hefði mælst í Torfajökulsöskjunni.